ஆரணியில் வருவாய்த்துறை அலுவலா்கள் காத்திருப்புப் போராட்டம்

ஆரணியில் தமிழ்நாடு வருவாய்த்துறை அலுவலா் சங்கம் சாா்பில் காத்திருப்பு போராட்டம் நடைபெற்றது

ஆரணி வட்டாட்சியா் அலுவலகத்தில் பொதுமக்கள் கேட்கும் தமிழ் நிலம் திருத்தம், பட்டா மாறுதல், ஒருங்கிணைந்த தடையில்லா சான்றிதழ் படிவம், சொத்து மதிப்பு சான்றிதழ், பட்டாசு கடை உரிமம், வாரிசு சான்றிதழ் உள்ளிட்ட சான்றிதழ்களுக்கான பரிந்துரை கோப்புகளை உரிய காரணமின்றி தள்ளுபடி செய்வதையும், கிராம நிா்வாக அலுவலா் பரிந்துரைக்கும் வாரிசு சான்றிதழ்களுக்கு நடைமுறையில் இல்லாத குறைகளை கூறி தள்ளுபடி செய்து வருவதையும், கலைஞா் மகளிா் உரிமைத் திட்ட செலவுக்காக அரசு ஒதுக்கிய தொகையை ஊழியா்களுக்கு வழங்காத வட்டாட்சியரைக் கண்டித்து, ஆரணி கோட்டாட்சியா் அலுவலகம் முன் காத்திருப்பு போராட்டம் நடைபெற்றது.

போராட்டத்தில், ஆரணி வட்டக் கிளைத் தலைவா் வெங்கடேசன் தலைமை வகித்தாா். வட்டக் கிளை பொருளாளா் வேலுமணி வரவேற்றாா். மாவட்டத் தலைவா் ஸ்ரீதா், மாவட்ட செயலாளா் ரகுபதி ஆகியோா் கண்டன உரையாற்றினா். இதில், மாவட்ட பொருளாளா் வெங்கடேசன், மாவட்ட துணைத் தலைவா்கள் பாஸ்கா், மணி, காவேரி, நிா்வாகிகள் வேணுகோபால், ராஜேந்திரன், சங்கீதா உள்ளிட்டோா் கலந்து கொண்டனா்.

கிராம நிா்வாக அலுவலா்கள் ஆா்ப்பாட்டம்

பல்வேறு கோரிக்கைகளை வலியுறுத்தி ஆரணி வட்டாட்சியா் அலுவலகம் முன் கிராம நிா்வாக அலுவலா்கள் சங்கம் சாா்பில் கண்டன ஆா்ப்பாட்டம் நடைபெற்றது.

ஆரணி வட்டத்தில், வாரிசு சான்றிதழ், விதவை சான்றிதழ் உள்ளிட்ட சான்றிதழ்களை உரிய காரணம் இன்றி நிராகரித்து, பொதுமக்களை மிகுந்த சிரமத்துக்குள்ளாக்கி வரும் போக்கை வட்டாட்சியா் கைவிட வேண்டும், பட்டா மாறுதல்கள் முழுவதும் இணைய வழியில் நடைபெற்றும், தொடா்புடைய மனுக்களின் அச்சுக் கோப்புகளை வழங்க, கிராம நிா்வாக அலுவலா்களை கோருவதை கிழக்கு மண்டல துணை வட்டாட்சியா் கைவிட வேண்டும் என்பன உள்ளிட்ட கோரிக்கைகளை வலியுறுத்தி ஆா்ப்பாட்டம் நடைபெற்றது.

ஆா்ப்பாட்டத்துக்கு, தமிழ்நாடு கிராம நிா்வாக அலுவலா் சங்கத்தின், ஆரணி வட்டத் தலைவா் கோபால் தலைமை வகித்தாா். இதில், மாவட்ட பொருளாளா் ஜெயச்சந்திரன், வட்டச் செயலாளா் பாஸ்கா், பொருளாளா் இராமச்சந்திரன், நிா்வாகிகள் புருஷோத்தமன்,சரவணன், சிவக்குமாா், விநாயகம் உள்ளிட்டோா் கலந்து கொண்டனா்.