தொழிற்கல்வி படிக்கும் மாணவர்கள் கல்வி உதவித்தொகை பெற விண்ணப்பிக்க அழைப்பு

தொழிற்கல்வி படிக்கும் மாணவர்கள் தமிழக அரசின் ரூ.50 ஆயிரம் கல்வி உதவித்தொகை பெற விண்ணப்பிக்கலாம்.

இது குறித்து நாமக்கல் மாவட்ட கலெக்டர் ஸ்ரேயா சிங் வெளியிட்டுள்ள செய்திக்குறிப்பில் கூறியுள்ளதாவது:- அரசு, அரசு உதவி பெறும் மற்றும் தனியார் இன்ஜினியரிங் கல்லூரிகள், மருத்துவ கல்லூரிகள், பல் மருத்துவக் கல்லூரிகள், வேளாண்மைக் கல்லூரிகள், கால்நடை மருத்துவக் கல்லூரிகள் மற்றும் சட்டக் கல்லூரிகளில் படிக்கும் ஏழ்மை நிலையில் உள்ள மாணவ மாணவிகளுக்கு, தமிழக முதலமைச்சரின் பொது நிவாரண நிதியிலிருந்து ஒருமுறை ஊக்கத்தொகை ரூ.50 ஆயிரம் வழங்கப்படுகிறது. இந்த திட்டத்தின் கீழ் பயன்பெற சம்பந்தப்பட்ட மாணவ மாணவிகள் சிங்கிள் விண்டோ கவுன்சலிங் மூலம் படிப்புக்கு தேர்வு செய்யப்பட்டிருக்க வேண்டும். நிர்வாக ஒதுக்கீட்டில் சேர்க்கை பெற்றவர்கள் நிதியுதவி பெற முடியாது. தமிழ்நாட்டினை வசிப்பிடமாக கொண்டவராக இருத்தல் வேண்டும். குடும்பத்தலைவரின் ஆண்டு வருமானம் ரூ.72,000க்கு மிகாமல் இருக்க வேண்டும். எற்கனவே கல்வி உதவி பெறும் விவசாயிகளின் வாரிசுகள், இறந்த அரசு பணியாளர்களின் வாரிசுகள், பணியிலிருக்கும் ராணுவ வீரர்களின் வாரிசுகள், முன்னாள் ராணுவ வீரர்களின் வாரிசுகள் ஆகியோர் இத்திட்டத்தின் கீழ் கல்வி உதவித்தொகை பெற இயலாது.

தகுதியான மாணவ மாணவிகள் உரிய ஆவணங்களில், அரசிதழ் பதிவு பெற்ற அலுவலரால் அத்தாட்சி செய்யப்பட்ட நகலுடன் மாவட்ட கலெக்டர் அல்லது தாங்கள் கல்வி படிக்கும் கல்லூரி முதல்வர் மூலமாக விண்ணப்பங்களை அனுப்பி வைக்க வேண்டும். விண்ணப்பத்துடன், 12ம் வகுப்பு மதிப்பெண் பட்டியல், தமிழ்நாட்டில் வசிப்பவர் என்பதற்கான தாசில்தாரின் வசிப்பிடச்சான்று, குடும்ப தலைவரின் ஆண்டு வருமானச் சான்று, குடும்ப உறுப்பினர்களின் வயது, கல்வித்தகுதி வருமான விவரங்கள் அடங்கிய விவர பட்டியல், சிங்கிள் விண்டோ கவுன்சலிங் மூலம் சேர்க்கை பெற்றதற்கான உத்தரவு ஆகியவற்றின் நகல்களில் அரசிதழ் பதிவு பெற்ற அலுவலரால் அத்தாட்சி செய்யப்பட்டு இணைக்கப்பட வேண்டும். தகுதியான நபர்களிடமிருந்து பெறப்படும் விண்ணப்பங்கள் பரிசீலனை செய்யப்பட்டு அரசுக்கு பரிந்துரை செய்யப்பட்டு நிதியுதவி வழங்கப்படும் என்று தெரிவிக்கப்பட்டுள்ளது.