அருணாசலேஸ்வரா் கோவில் உண்டியல் காணிக்கை ரூ.2.55 கோடி

திருவண்ணாமலையில் மலையையே சிவனாக வழிபடுவதால் சிவனின் அக்னி ஸ்தலமான அருணாசலேஸ்வரர் கோவிலுக்கு தினமும் ஏராளமான உள்ளூா், வெளியூா், வெளிநாடுகளைச் சேர்ந்த பக்தா்கள் வந்து, செல்கின்றனா்.

திருவண்ணாமலை அண்ணாமலையார் கோவில், கிரிவலப் பாதையில் உள்ள ஆதி அண்ணாமலையார் கோவில், அஷ்டலிங்க கோவில்கள், திருநேர் அண்ணாமலையார் கோவில் மற்றும் துர்க்கை அம்மன் கோவிலில் இந்து சமய அறநிலையத்துறை சார்பில் உண்டியல் வைக்கப்பட்டு பக்தர்களிடம் காணிக்கை பெறப்படுகிறது. திருவண்ணாமலை அண்ணாமலையார் கோவிலில் சுவாமி தரிசனம் செய்யும் பக்தர்கள் நேர்த்திக்கடனாக உண்டியலில் பணம், வெள்ளி, தங்கம் போன்றவற்றை காணிக்கையாக செலுத்துகின்றனர்.

ஒவ்வொரு மாதமும் பௌர்ணமி கிரிவலத்துக்கு பிறகு உண்டியல் காணிக்கை எண்ணப்பட்டு, வங்கியில் செலுத்துவது வழக்கம்.

பங்குனி மாதத்திற்கான பௌர்ணமி கடந்த மாதம் 23, 24 தேதிகளில் நடைபெற்றது. அன்று சிறப்பான பங்குனி உத்திர விழாவும் அண்ணாமலையார் திருக்கல்யாண விழாவும் இணைந்து வந்ததால் லட்சக்கணக்கான பக்தர்கள் கிரிவலம் வந்தனர்.

அதன்படி பங்குனி மாதத்திற்கான உண்டியல் காணிக்கை எண்ணும் பணி நேற்று வியாழக்கிழமை காலை 8 மணி முதல் இரவு வரை நடைபெற்றது.

கோவில் இணை ஆணையர் ஜோதி தலைமையில் அறங்காவலர் குழுத் தலைவர் ஜீவானந்தம் மற்றும் அறங்காவலர்கள் ராஜாராம், கோமதி குணசேகரன், சினம் பெருமாள் ஆகியோர் முன்னிலையில் 100 க்கும் மேற்பட்ட தன்னார்வலர்கள் மற்றும் ஊழியர்கள் கலந்து கொண்டு உண்டியல் காணிக்கை எண்ணும் பணியில் ஈடுபட்டனர். உண்டியல் காணிக்கை எண்ணும் பணி, வீடியோ கேமராவில் பதிவு செய்யப்பட்டன.

அப்போது, கோவில் உண்டியலில் பக்தர்கள் ரூ.2 கோடியே 55 லட்சத்து 2 ஆயிரத்து 820 காணிக்கையாக செலுத்தியிருந்தனர். மேலும், 265 கிராம் தங்கம், 2.32 கிலோ வெள்ளி ஆகியவற்றையும் உண்டியலில் பக்தர்கள் காணிக்கையாக செலுத்தியிருந்தனர். அதேபோல், வெளிநாட்டு கரன்சிகளும் உண்டியலில் செலுத்தப்பட்டிருந்தது. பின்னர், உண்டியல் காணிக்கை தொகை, கோவில் கணக்கில் வங்கியில் செலுத்தப்பட்டது.

அண்ணாமலையார் கோவிலுக்கு வருகை தரும் பக்தர்களின் எண்ணிக்கை நாளுக்கு நாள் அதிகரித்து வருகிறது. எனவே, ஒவ்வொரு மாதமும் உண்டியல் காணிக்கையும் அதிகரித்து வருவது குறிப்பிடத்தக்கது.