திருவண்ணாமலை மக்களவைத் தொகுதியில் 1,722 வாக்குச்சாவடிகள் அமைப்பு

திருவண்ணாமலை மக்களவைத் தொகுதியில் அமைக்கப்பட்டுள்ள 1,722 வாக்குச் சாவடிகளில் பயன்படுத்தத் தேவையான 4,146 மின்னணு வாக்குப்பதிவு இயந்திரங்கள், 2,073 கட்டுப்பாட்டு அலகுகள் வியாழக்கிழமை பலத்த போலீஸ் பாதுகாப்புடன் அனுப்பி வைக்கப்பட்டன.

தமிழகம் முழுவதும் வெள்ளிக்கிழமை (ஏப்ரல் 19) மக்களவைத் தோ்தலுக்கான வாக்குப்பதிவு நடைபெறுகிறது. திருவண்ணாமலை மாவட்டத்தில் திருவண்ணாமலை, ஆரணி என இரு மக்களவைத் தொகுதிகள் உள்ளன.

திருவண்ணாமலை மக்களவைத் தொகுதி

திருவண்ணாமலை மக்களவைத் தொகுதியில் திருவண்ணாமலை, கீழ்பென்னாத்தூா், செங்கம், கலசப்பாக்கம் சட்டப்பேரவைத் தொகுதிகளும், திருப்பத்தூா் மாவட்டத்தைச் சோ்ந்த திருப்பத்தூா், ஜோலாா்பேட்டை சட்டப்பேரவைத் தொகுதிகளும் என மொத்தம் 6 தொகுதிகள் இடம்பெற்றுள்ளன.

1,722 வாக்குச்சாவடிகள் அமைப்பு

வாக்காளா்கள் வாக்களிக்க ஏதுவாக திருவண்ணாமலை மக்களவைத் தொகுதிக்குள்பட்ட ஜோலாா்பேட்டை சட்டப்பேரவைத் தொகுதியில் 267 வாக்குச் சாவடிகள், திருப்பத்தூா் தொகுதியில் 267 வாக்குச்சாவடிகள், செங்கம் (தனி) தொகுதியில் 323 வாக்குச் சாவடிகள், திருவண்ணாமலை தொகுதியில் 299 வாக்குச் சாவடிகள், கீழ்பென்னாத்தூா் தொகுதியில் 285 வாக்குச் சாவடிகள், கலசப்பாக்கம் தொகுதியில் 281 வாக்குச் சாவடிகள் என மொத்தம் 1,722 வாக்குச் சாவடிகள் அமைக்கப்பட்டு உள்ளன.

4,146 மின்னணு வாக்குப்பதிவு இயந்திரங்கள்

ஜோலாா்பேட்டை தொகுதியில் 646 மின்னணு வாக்குப்பதிவு இயந்திரங்கள், 323 கட்டுப்பாட்டு அலகுகள், 349 விவி பாட் கருவிகள் (அளித்த வாக்குகளை உறுதி செய்யும் கருவி) வாக்குப்பதிவின்போது பயன்படுத்தப்படுகிறது.

இதேபோல, திருப்பத்தூா் தொகுதியில் 646 மின்னணு வாக்குப்பதிவு இயந்திரங்கள், 323 கட்டுப்பாட்டு அலகுகள், 349 விவி பாட் கருவிகளும், செங்கம் (தனி) தொகுதியில் 774 மின்னணு வாக்குப்பதிவு இயந்திரங்கள், 387 கட்டுப்பாட்டு கருவிகள், 419 விவி பாட் கருவிகளும், திருவண்ணாமலை தொகுதியில் 722 மின்னணு வாக்குப்பதிவு இயந்திரங்கள், 361 கட்டுப்பாட்டு கருவிகள், 384 விவி பாட் கருவிகளும் பயன்படுத்தப்படுகிறது.

இதேபோல, கீழ்பென்னாத்தூா் தொகுதியில் 684 மின்னணு வாக்குப்பதிவு இயந்திரங்கள், 342 கட்டுப்பாட்டு கருவிகள், 370 விவி பாட் கருவிகளும், கலசப்பாக்கம் தொகுதியில் 674 மின்னணு வாக்குப்பதிவு இயந்திரங்கள், 337 கட்டுப்பாட்டு கருவிகள், 365 விவி பாட் கருவிகளும் பயன்படுத்தப்படுகிறது.

வாக்குச்சாவடி பணியில் 8,308 போ்..

வாக்குச்சாவடி பணியில் அரசு அலுவலா்கள், ஆசிரியா்கள் ஈடுபடுத்தப்படுகின்றனா். அதன்படி, ஜோலாா்பேட்டை தொகுதியில் 1,306 பேரும், திருப்பத்தூா் தொகுதியில் 1,282 பேரும், செங்கம் தொகுதியில் 1,556 பேரும், திருவண்ணாமலை தொகுதியில் 1,440 பேரும், கீழ்பென்னாத்தூா் தொகுதியில் 1,372 பேரும், கலசப்பாக்கம் தொகுதியில் 1,352 என மொத்தம் 8 ஆயிரத்து 308 போ் வாக்குச்சாவடி பணியில் ஈடுபடுகின்றனா்.

நுண் மேற்பாா்வையாளா்கள்..

திருவண்ணாமலை மக்களவைத் தொகுதியில் பதற்றமானவை என்று கண்டறியப்பட்டு உள்ள 101 இடங்களில் அமைக்கப்பட்டுள்ள 167 வாக்குச்சாவடி மையங்களுக்கு 120 நுண் மேற்பாா்வையாளா்கள் நியமிக்கப்பட்டு உள்ளனா்.

பணி ஆணைகள் வழங்கல்..

இந்நிலையில், திருவண்ணாமலை, கீழ்பென்னாத்தூா், செங்கம், கலசப்பாக்கம் சட்டப்பேரவைத் தொகுதிகளில் அமைக்கப்பட்டுள்ள வாக்குச்சாவடிகளில் பணிபுரியும் அரசு அலுவலா்கள் மற்றும் ஆசிரியா்களுக்கான பணி ஆணைகளை மாவட்ட தோ்தல் நடத்தும் அலுவலரும், ஆட்சியருமான தெ.பாஸ்கர பாண்டியன் வியாழக்கிழமை அளித்து, உரிய அறிவுரைகளை வழங்கினாா்.

வாக்குப்பதிவு இயந்திரங்கள் அனுப்பி வைப்பு..

இதேபோல, திருவண்ணாமலை, கீழ்பென்னாத்தூா், செங்கம், கலசப்பாக்கம் தொகுதிகளின் வாக்குச்சாவடி மையங்களுக்குத் தேவையான மின்னணு வாக்குப்பதிவு இயந்திரங்கள், கட்டுப்பாட்டு கருவிகள், விவி பாட் கருவிகளை பலத்த போலீஸ் பாதுகாப்புடன் அனுப்பி வைக்கும் பணியை மாவட்ட தோ்தல் நடத்தும் அலுவலா் பாஸ்கர பாண்டியன் தொடங்கி வைத்தாா்.

இந்த நிகழ்ச்சிகளில், உதவி தோ்தல் நடத்தும் அலுவலா்களான ஆா்.மந்தாகினி, சாந்தி, செந்தில் குமாா், வட்டாட்சியா்கள் தியாகராஜன் (திருவண்ணாமலை), சரளா (கீழ்பென்னாத்தூா்), முருகன் (செங்கம்), ராஜேஸ்வரி (கலசப்பாக்கம்) மற்றும் அரசுத்துறை அலுவலா்கள் கலந்து கொண்டனா்.