பாமக வளர்ச்சி குறித்து கட்சியின் நிறுவனர் ராமதாஸ் ஆலோசனை

பாமகவின் வளர்ச்சிப் பணிகள் குறித்தும், நகர்ப்புற உள்ளாட்சித் தேர்தல்களில் பாமக செயல்பாடுகள் குறித்தும் திருவண்ணாமலை மாவட்ட செயலாளர்கள் மற்றும் மாவட்ட தலைவர்களுடன் கட்சியின் நிறுவனர் மருத்துவர் இராமதாஸ் இன்று ஆலோசனை நடத்தினார்.

கட்சி வளர்ச்சிப்பணிகள் குறித்து மருத்துவர் இராமதாஸ் நடத்தி வரும் தொடர் ஆலோசனைகளில் இது மூன்றாவது கலந்தாய்வுக் கூட்டம் ஆகும். தைலாபுரம் தோட்டத்தில் நடைபெற்ற ஆலோசனைக் கூட்டத்தில் பாட்டாளி மக்கள் கட்சியின் தலைவர் ஜி.கே.மணி, பொருளாளர் திலகபாமா, இணைப் பொதுச் செயலாளர் இசக்கி படையாட்சி, அமைப்பு செயலாளர் செல்வக்குமார், திருவண்ணாமலை மாவட்ட செயலாளர் கணேஷ்குமார், மாவட்ட தலைவர்கள் அ.ம. கிருஷ்ணன், ஆறுமுகம் ஆகியோர் கலந்து கொண்டனர்.

ஒவ்வொரு மாவட்டத்திலும் கட்சியை வளர்த்தெடுப்பதற்காக மேற்கொள்ளப்பட வேண்டிய நடவடிக்கைகள் குறித்து இந்தக் கூட்டத்தில் மருத்துவர் இராமதாஸ் ஆலோசனைகளை வழங்கினார்.

பாமகவின் அனைத்து நிலை நிர்வாகிகளின் உழைப்பு, தியாகம், அர்ப்பணிப்பு உணர்வு உள்ளிட்டவற்றை பாராட்டிய இராமதாஸ், 'அனைத்து நிலைகளிலும்பாமகவை வலுப்படுத்த வேண்டும். அதற்காக மக்களை சந்திக்க வேண்டும். மக்கள் பிரச்சினைகளுக்காக போராட வேண்டும் என்று கேட்டுக் கொண்டார்.