திருவண்ணாமலையில் கொரோனா விதிகளை மீறினால் அபராதம்: ஆட்சியர் எச்சரிக்கை

திருவண்ணாமலை மாவட்டத்தில் 15 வயது முதல் 18 வயதிற்கு உட்பட்ட சிறுவர்களுக்கு தடுப்பூசி செலுத்தும் திட்டம் தொடங்கப்பட்டுள்ளது.

மாவட்டத்தை பொறுத்தவரையில் 91 சதவீத பேருக்கு தடுப்பூசி செலுத்தி இருந்தாலும் கடந்த ஓரிரு நாட்களாக கொரோனா பாதித்தவர்களின் எண்ணிக்கை அதிகரித்து கொண்டே வருகிறது. இதனால் அனைவரும் முகக்கவசம் அணிய வேண்டும். தனிமனித இடைவெளியை பின்பற்ற வேண்டும். முகக்கவசம் அணியாமல் பொது இடங்களுக்கு வருபவர்கள் மீது கடுமையான நடவடிக்கை எடுக்கப்படும். கொரோனா தொற்று நடைமுறைகளை பின்பற்றப்படாமல் இருந்தால் அபராதம் வசூலிக்கப்படும்.

திருவண்ணாமலை மாவட்டத்தில் ஒமிக்ரான் பாதித்த 3 நபர்களை கண்டு தொற்று பரவாமல் பாதுகாத்ததால் ஒமிக்ரான் அதிகம் பரவாமல் கட்டுக்குள் வந்தது, என மாவட்ட ஆட்சியர் முருகேஷ் செய்தியாளர்களிடம் கூறினார். முன்னதாக கல்வி உதவிகாட்டி மையம் எண்- 14417, குழந்தைகள் உதவி எண்-1098 அடங்கிய முத்திரையினை பள்ளி மாணவிகளின் புத்தகத்தில் அச்சிட்டு தொடங்கி வைத்தனர்.

திருவண்ணாமலை மாவட்டத்தில் 10-ம் வகுப்பில் 34 ஆயிரத்து 331 மாணவர்களும், 11-ம் வகுப்பில் 30 ஆயிரத்து 880 மாணவர்களும், 12-ம் வகுப்பில் 29 ஆயிரத்து 756 மாணவர்களும் என 94 ஆயிரத்து 967 மாணவர்களுக்கு தடுப்பூசி போடும் பணி நடைபெற உள்ளது என்பது குறிப்பிடத்தக்கது.