நாமக்கல் மாவட்டத்தில் 3 புதிய வாக்குச்சாவடிகள் அமைக்கப்படும்: கலெக்டர்
நாமக்கல் மாவட்டத்தில் அதிக வாக்காளர்களைக் கொண்ட 3 வாக்குச்சாவடிகளை பிரித்து புதிய வாக்குச்சாவடிகள் அமைக்கப்படும் என கலெக்டர் தெரிவித்தார்.
HIGHLIGHTS
கலெக்டர் தலைமையில் நடைபெற்ற ஆலோசனை கூட்டத்தில் கலந்து கொண்ட அரசியல் கட்சியினர்.
நாமக்கல் கலெக்டர் அலுவலகத்தில், வாக்குச்சாவடிகளை பிரித்தல் மற்றும் மாற்றி அமைத்தல் குறித்து, அங்கீகரிக்கப்பட்ட அரசியல் கட்சி பிரமுகர்களுடன் ஆலோசனைக்கூட்டம் நடைபெற்றது. மாவட்ட கலெக்டர் ஸ்ரேயாசிங் நிகழ்ச்சிக்கு தலைமை வகித்து பேசியதாவது:
மாவட்டத்திலுள்ள 6 சட்டசபை தொகுதிகளிலும் மொத்த உள்ள 1,623 வாக்கு சாவடிகளில் 1,500 வாக்காளர்களுக்கு மேல் உள்ள வாக்குசாவடிகளை பிரித்து 3 புதிய வாக்குச் சாவடிகள் அமைக்கப்படுகிறது. மேலும், பழுதடைந்த வாக்குசாவடி கட்டிடங்களுக்கு பதில் வேறு இடங்கள் தேர்வு செய்யப்படும். 6 சட்டசபை தொகுதியிலும் 11 வாக்குசாவடிகள் கட்டிட மாற்றம், அமைவிட மாற்றம் மற்றும் பெயர் மாற்றம் செய்யப்படுகிறது.
இராசிபுரம் சட்டசபை தொகுதியில் சுவாமி சிவானந்தா சாலையில் உள்ள அரசினர் மேல்நிலைப்பள்ளி, நாமக்கல் தொகுதியில் நாமக்கல் வடக்கு நல்லிபாளையம் அரசு மேல்நிலைப்பள்ளி மற்றும் திருச்செங்கோடு தொகுதியில் ஒக்கிலிப்பட்டி ஊரக சமுதாய சேவை மைய கட்டிடம் ஆகிய 3 வாக்குசாவடிகள் 1,500 வாக்காளர்களுக்கு மேல் இருப்பதால் பிரித்து புதிதாக வாக்குசாவடிகள் அமைக்கப்பட உள்ளது என கலெக்டர் தெரிவித்தார்.
இக்கூட்டத்தில் டிஆர்ஓ துர்காமூர்த்தி, நாமக்கல் ஆர்டிஓ மஞ்சுளா, திருச்செங்கோடு ஆர்டிஓ இளவரசி உள்ளிட்ட அதிகாரிகள் மற்றும் அரசியல் கட்சிப்பிரமுகர்கள் கலந்துகொண்டனர்.
