பர்கூர் மலைப்பகுதியில் யானை மிரட்டலுக்கு இடையே பெண்ணிற்கு பிறந்த குழந்தை

ஈரோடு மாவட்டம் அந்தியூர் அருகே உள்ள பர்கூர் மலைப்பகுதியில் தேவர்மலை என்ற மலை கிராமத்தில் சிவம்மாள் என்பவருக்கு நேற்று இரவு பிரசவ வலி வரவே 108 ஆம்புலன்சை அழைத்துள்ளனர், தொடர்ந்து அங்கு சென்ற 108 ஆம்புலன்ஸ் சிவம்மாள் மற்றும் அவரது உறவினர்களை ஏற்றிக்கொண்டு, பர்கூர் ஆரம்ப சுகாதார நிலையம் நோக்கி வந்து கொண்டிருந்தபோது தாமரைக்கரையை அடுத்து குண்டுகள் பசுவேஸ்வரர் கோவில் என்ற இடத்தில் சிவம்மாளுக்கு அதிகப் பிரசவவலி வரவே 108 ஆம்புலன்ஸை ஓரமாக நிறுத்தி அடர்ந்த வனப் பகுதியிலேயே அவசரகால மருத்துவ உதவியாளர் சிவா பிரசவம் பார்த்தார், அப்போது சிவம்மாளுக்கு அழகிய ஆண் குழந்தை பிறந்தது.

மேலும், இங்கு பிரசவம் பார்த்துக் கொண்டிருந்தபோதே 500 மீட்டர் தூரம் தள்ளி சுண்டப்பூர் பிரிவு என்ற இடத்தில் பெண் யானை ஒன்று நின்று கொண்டிருப்பதாக அவ்வழியாக சென்றவர்கள் 108 ஆம்புலன்ஸ் ஓட்டுனர் ஆனந்தனிடம் தெரிவித்தனர்.தொடர்ந்து பிரசவம் முடித்துக்கொண்டு பர்கூர் அரசு ஆரம்ப சுகாதார நிலையத்திற்கு செல்ல வண்டியை எடுத்து கொண்டு சென்ற போது யானை அதே இடத்தில் நின்று கொண்டு உணவு சாப்பிட்டுக் கொண்டிருந்தது, சுமார் 30 நிமிடங்கள் காத்திருந்த பின்னர் யானை அடர்ந்த வனப்பகுதிக்குள் சென்றது, அதை தொடர்ந்து அரசு ஆரம்பப் சுகாதார மையத்திற்குச் சென்று தாய் மற்றும் குழந்தையை சிகிச்சைக்காக அனுமதித்தனர், அங்கு அவர்கள் நலமுடன் இருப்பதாக மருத்துவர்கள் தெரிவித்தனர்.

அடர்ந்த வனப்பகுதியில் சுமார் 500 மீட்டர் தூரத்தில் யானை இருந்தும், பதற்றமடையாமல் பிரசவம் பார்த்து மருத்துவமனையில் தாயையும் சேயையும் பத்திரமாக சேர்த்த அவசரகால மருத்துவ நிபுணர் சிவா மற்றும் ஓட்டுநர் ஆனந்திற்கு பாராட்டுக்கள் குவிந்து வருகின்றன.பர்கூர் -தாமரைக்கரை பிரதான சாலையில் கடந்த சில நாட்களாக ஒற்றை ஆண் காட்டு யானை சுற்றித்திரிந்த நிலையில், நேற்று இரவு சுண்டப்பூர் பிரிவு என்ற இடத்தில் பெண் யானை ஒன்று சாலையில் உலா வந்ததுள்ளது குறிப்பிடத்தக்கது.