அ.தி.மு.க.வுடன் கூட்டணி நீடிக்கிறது; ஜி.கே.வாசன் பேட்டி

திருவண்ணாமலை மாவட்டத்தில் தமிழ் மாநில காங்கிரஸ் தலைவர் ஜிகே வாசன் பல்வேறு நிகழ்ச்சிகளில் கலந்து கொண்டார். பின்பு திருவண்ணாமலையில் செய்தியாளர்களை சந்தித்தார். அப்போது அவர் கூறுகையில்,

நகர்புற உள்ளாட்சி தேர்தலிலும் அதிமுகவுடனான கூட்டணி நீடிக்கிறது. கட்சியின் செயற்குழு கூட்டம் சென்னையில் வருகிற 18ம் தேதி நடைபெற உள்ளது. இந்த ஆலோசனை கூட்டத்தில் நகர்புற உள்ளாட்சி தேர்தலில் தமிழகத்தில் எந்தெந்த இடங்களில் போட்டியிடுவது என்பது குறித்து ஆலோசனை செய்து முடிவு எடுக்கப்படும் என கூறினார்

மேலும் அவர் கூறுகையில், கொரோனா தொற்றுக்கு பிறகு நாடாளுமன்ற மழைக்கால கூட்டத்தொடர் நடைபெற்று வருகிறது. இந்த கூட்டத்தொடர் முழுமையாக நடக்க வேண்டும். சட்ட மசோதாக்கள் அனைத்தும் விவாதம் செய்து நிறைவேற்ற வேண்டும். எதிர்க்கட்சிகள் அவையை முடக்கக்கூடாது என்று கூறினார்

தமிழகத்தில் தமிழ் மொழிக்கு முன்னுரிமை அளிப்பது வரவேற்கத்தக்கது. இருப்பினும் மற்ற மொழிகளுக்கு கொடுக்கக்கூடிய முக்கியத்துவத்தை குறைக்கக்கூடாது. தேர்தல் வாக்குறுதிகள் அனைத்தையும் தி.மு.க. நிறைவேற்ற வேண்டும் எனவும் கூறினார்.