திருவண்ணாமலை அண்ணாமலையார் கோயிலில் திருவூடல் விழா ரத்து

திருவண்ணாமலை அருணாசலேஸ்வரர் கோவிலில், இன்று முதல் கொரோனா தடுப்பூசி, 2 தவணைகள் செலுத்தியவர்கள் மட்டுமே சாமி தரிசனம் செய்வதற்கு அனுமதிக்கப்படுவார்கள் என்று கலெக்டர் முருகேஷ் தெரிவித்து உள்ளார். மேலும், கோவிலுக்கு சென்று இப்பணிகளை, ஆட்சியர் நேரில் சென்று பார்வையிட்டு ஆய்வு செய்தார். தொடர்ந்து, அருணாசலேஸ்வரர் கோவில் எதிரே மாட வீதியில் ஆய்வு மேற்கொண்டார்.

கண்காணிப்பு பணிகள் குறித்து, போலீஸ் சூப்பிரண்டு பவன்குமார், கூடுதல் கலெக்டர் பிரதாப், உதவி போலீஸ் சூப்பிரண்டு கிரண்ஸ்ருதி ஆகியோருடன் ஆலோசனை மேற்கொண்டார். பின்னர் தற்காலிக காய்கறி மற்றும் பூ மார்க்கெட் அமைய உள்ள திருவண்ணாமலை காந்தி நகர் பைபாஸ் சாலையில் உள்ள மைதானம் மற்றும் திருவண்ணாமலை நகராட்சி அலுவலகத்திற்கு அருகில் உள்ள மைதானத்தையும் பார்வையிட்டு, வியாபாரிகளுக்கு தேவையான அடிப்படை வசதிகளை செய்து கொடுக்க அதிகாரிகளுக்கு அறிவுரை வழங்கினார்.

திருவண்ணாமலை அருணாசலேஸ்வரர் கோவிலில், கடந்த 5-ம் தேதி முதல், உத்தராயண புண்ணிய கால உற்சவ நிகழ்ச்சி நடைபெற்று வருகிறது. 10 நாட்கள் நடைபெறும் விழாவில், வருகிற 14-ம் தேதி தாமரை குளத்தில் தீர்த்தவாரி நிகழ்ச்சியுடன் நிறைவு பெறும். நிகழ்ச்சியையொட்டி காலை மற்றும் இரவில் சாமி மாட வீதியுலா நடைபெற்று வந்தது. இரவு ஊரடங்கு மற்றும் முழு ஊரடங்கு காரணமாக நேற்று முன்தினம் இரவு முதல், வீதி உலா ரத்து செய்யப்பட்டு கோவில் வளாகத்திலேயே நடைபெற்றது.

இது குறித்து கோவில் முக்கிய குருக்களான ரமேஷ் மற்றும் கீர்த்திவாசனை வரவழைத்து விவரங்களை கலெக்டர் கேட்டறிந்தார். பின்னர் கலெக்டர் முருகேஷ் கூறுகையில், இன்று முதல், வரும் 14-ந் தேதி வரை சாமி மாட வீதிஉலா பக்தர்கள் இன்றி போலீஸ் பாதுகாப்புடன் நடைபெறும். 15-ம் தேதி திருவூடல் நிகழ்ச்சி கோவில் வளாகத்திலேயே நடைபெறும் என்றார்.