ஒலி,ஒளி அமைப்பினர் கொரோனா கட்டுப்பாடுகளில் தளர்வுகேட்டு மனு

ஒலி ஒளி அமைப்பாளர்கள், சமையல் கலைஞர்கள், பந்தல் மேடை அமைப்பாளர்கள் வாடகை பாத்திர பொருட்கள் உரிமையாளர்கள் நிகழ்ச்சி ஒருங்கிணைப்பாளர்கள் என இவர்களை சார்ந்துள்ள சுமார் 5 லட்சத்திற்கும் மேற்பட்ட தொழிலாளர்களை கொரோனா இரண்டாவது அலையில் இருந்து பாதுகாத்துக்கொள்ள தமிழக அரசின் கட்டுப்பாடுகளில் இருந்து தளர்வுகளை அளிக்க கோரி மாவட்ட ஆட்சியரிடம் மனு அளித்தனர்.

2020-ம் ஆண்டு கொரோனா நோய்த்தொற்று பாதிப்பை கட்டுப்படுத்த மத்திய, மாநில அரசுகள் கொண்டு வந்த ஊரடங்கு உத்தரவினால் மேடை ஒலி ஒளி அமைப்பாளர்கள் சமையல் கலைஞர்கள் வாடகை பாத்திரம் பொருட்கள் உரிமையாளர்கள் மற்றும் நிகழ்ச்சி ஒருங்கிணைப்பாளர்கள் என அனைவரும் வாழ்வாதாரம் இழந்து இருந்த சூழ்நிலையில் தற்போது தான் அதிலிருந்து மீண்டு வர தொடங்கியதாகவும்.

இந்த நிலையில் நாடு முழுவதும் கொரோனா பாதிப்பு இரண்டாவது அலை தொடங்கியுள்ள நிலையில் தமிழக அரசு மீண்டும் பல்வேறு கட்டுப்பாடுகளை விதித்துள்ளது. இதனால், திருவண்ணாமலை மாவட்டத்தில் ஒலி ஒளி அமைப்பாளர்கள், சமையல் கலைஞர்கள், வாடகை பாத்திரம் பொருட்கள் உரிமையாளர்கள் மற்றும் நிகழ்ச்சி ஒருங்கிணைப்பாளர்கள் என 50 ஆயிரத்திற்கும் மேற்பட்டோர் இருப்பதாகவும் இவர்களை சார்ந்து தொழில் செய்பவர்கள் 5 லட்சத்திற்கும் மேல் உள்ளதாகவும், மீண்டும் இவர்களுடைய வாழ்வாதாரம் பாதிக்கும் சூழ்நிலை உருவாகி உள்ளதாக தெரிவித்தனர்.

தற்போது விழாக் காலம் என்பதால் இந்த சூழ்நிலையில் திருவிழா நிகழ்வுகளை தடை செய்தும் திருமண விழாக்களில் 100 நபர்கள் மட்டுமே கலந்து கொள்ள வேண்டும் என்ற தமிழக அரசின் அறிவிப்பு மீண்டும் தங்களை பாதாளத்துக்கு தள்ளும் சூழ்நிலை ஏற்பட்டிருக்கிறது. தமிழக அரசு இதை கவனத்தில் கொண்டு கட்டுப்பாடுகளுடன் திருவிழாக்களை நடத்திக் கொள்ளவும், அரங்குகள் மற்றும் மண்டபங்களில் அனுமதிக்கப்பட்ட அளவில் 50% நபர்கள் கலந்து கொள்ளவும் அனுமதிக்குமாறு கேட்டு திருவண்ணாமலை மாவட்ட ஆட்சியர் அலுவலகத்திற்கு வந்து மனு அளித்தனர்.