மின்சாரம் தாக்கி உயிருக்கு போராடியவரை காப்பாற்றிய காவலருக்கு பாராட்டு

கீரனூர் அருகே நேற்று உடையாளிப்பட்டி சுடுகாடு அருகே மின்கம்பத்தில் பராமரிப்பு பணிகள் பார்த்துக்கொண்டிருந்த மின்வாரிய ஊழியருக்கு உதவி செய்து கொண்டிருந்த குன்னாண்டார்கோயில் ஆழ்வான் பட்டி கிராமத்தை சேர்ந்த பிரகாஷ். இவருக்கு திடீரென மின்சாரம் தாக்கி, மின்கம்பத்தில் உயிருக்கு போராடிய நிலையில் இருந்தார். இதனை பார்த்த அப்பகுதி பொதுமக்கள் உடையாளிப்பட்டி காவல்துறைக்கு தகவல் கொடுத்தனர்.

உடனடியாக சென்ற காவலர் வெள்ளைச்சாமி என்பவர் பொதுமக்களுடன் சேர்ந்து மின்கம்பத்தில் தொங்கிக் கொண்டிருந்த பிரகாஷ் என்பவரை மின் கம்பத்தில் இருந்து கீழே இறக்கி சிபிஆர் முறையில் முதலுதவி அளித்து 108 ஆம்புலன்ஸ் மூலம் அரசு மருத்துவக் கல்லூரி மருத்துவமனைக்கு அனுப்பி வைத்தார்.

உரிய நேரத்தில் முதலுதவி சிகிச்சை அளித்து இளைஞரை காப்பாற்றிய உடையாளிப்பட்டி காவல்நிலைய காவலர் வெள்ளைச்சாமியை புதுக்கோட்டை காவல் கண்காணிப்பாளர் நிஷா பார்த்திபன் இன்று நேரில் அழைத்து பாராட்டு சான்று மற்றும் வெகுமதி வழங்கினார்.