வெயில் காலத்தில் உடல் சூட்டை அதிகரிக்கும் இந்த உணவுகளை அவாய்டு பண்ணுங்க!

Foods to Avoid in Summer- கோடையில் தவிர்க்க வேண்டிய உணவுகள் - உடல் சூட்டை அதிகரிக்கும் உணவுகள்

கோடை காலம் வந்துவிட்டாலே இயல்பாகவே உடல் சூடு அதிகரிக்கும். அதனால் அந்த நேரங்களில் சில உணവுகளைத் தவிர்க்க வேண்டும். அவ்வாறு தவிர்க்கும்போது நம் உடல் ஆரோக்கியமாக இருப்பதோடு பலவிதமான நோய்களில் இருந்து நம்மை பாதுகாத்துக் கொள்ளலாம். இந்த உணவுகள் உடல் சூட்டை மட்டும் அதிகரிப்பது இல்லை; வேறு சில பிரச்சினைகளையும் உருவாக்கிவிடும்.

உடல் சூட்டை அதிகரிக்கக்கூடிய உணவுகளின் பட்டியல், இவற்றை கோடையில் தவிர்த்தல் நல்லது:

1. இறைச்சி வகைகள்

மாமிச உணவுகளில் ஆட்டிறைச்சி, கோழி இறைச்சி போன்றவை உடல் சூட்டை அதிகரிக்கும் தன்மை கொண்டவை. இவற்றில் புரதச்சத்து அதிகம் இருப்பதால், செரிமானம் ஆக அதிக நேரம் எடுக்கும். செரிமான மண்டலம் கூடுதல் நேரம் வேலை செய்யும்போது, அது உடலின் வெப்பநிலையை உயர்த்திவிடும்.

2. காரமான உணவுகள்

காரம் நிறைந்த உணவுகளை கோடையில் தவிர்ப்பது நல்லது. மிளகாய், மிளகு, இஞ்சி, மசாலாப் பொருட்கள் உடல் வெப்பநிலையை அதிகரிக்கும். இவை வியர்வையை ஏற்படுத்தி அதன் மூலம் சரும பிரச்சனைகளையும் வரவழைக்கும்.

3. கடல் உணவுகள்

கடல் உணவுகள் சிலருக்கு உடல் சூட்டை அதிகரிக்கும். கோடையில் இவற்றைக் குறைத்துக் கொள்வது நல்லது. மீன் தவிர்த்து அதிக எண்ணெய் கொண்ட வகைகள், இறால் போன்றவற்றைத் தவிர்ப்பது நல்லது.

4. துரித உணவுகள்

பர்கர், பீட்சா, சமோசா, போண்டா போன்ற துரித உணவுகளும், எண்ணெயில் பொரித்த உணவுகளும் உடலுக்குத் தீங்கு விளைவிக்கும். இவற்றால் உடல் பருமன், செரிமானக் கோளாறுகள் போன்ற பிரச்சினைகள் ஏற்படலாம். கோடையில் இந்த வகை உணவுகளால் உடல் உஷ்ணம் மேலும் அதிகரிக்கும்.

5. டீ / காபி

டீ, காபியில் காஃபின் உள்ளது. இது உடலை நீரிழப்புக்கு உள்ளாக்கும் தன்மை கொண்டது. கோடையில் காஃபின் அதிகம் எடுத்துக்கொண்டால் உடல் உஷ்ணம் அதிகமாகி தலைவலி, மயக்கம் போன்ற பிரச்சனைகள் வரலாம்.

6. உலர் பழங்கள் மற்றும் கொட்டைகள்

பாதாம், முந்திரி, பேரீச்சை போன்ற உலர் பழங்கள் மற்றும் கொட்டைகள் ஆரோக்கியமானவை என்றாலும், இவற்றின் தன்மை உடல் வெப்பநிலையை அதிகரிக்க செய்யும். இவற்றை கோடையில் அளவாக எடுத்துக்கொள்வது நல்லது, முற்றிலுமாக தவிர்க்க வேண்டியதில்லை.

7. பாக்கெட்டில் அடைக்கப்பட்ட பழச்சாறுகள்

இயற்கையாக பழங்களிலிருந்து எடுக்கப்படும் பழச்சாறுகளை குடிப்பதில் பிரச்சனை இல்லை. ஆனால் பாக்கெட்டுகளில் பதப்படுத்தப்படும் பழச்சாறுகளில் சர்க்கரை மற்றும் ப்ரிசர்வேடிவ்கள் அதிகமாக இருக்கும். இவை உடல் சூட்டை ஏற்படுத்துவதோடு எடை கூடுதல் போன்ற வேறு ஆரோக்கிய பிரச்சனைகளையும் உண்டாக்கும்.

8. சாஸ்கள் மற்றும் சாலட் டிரஸ்ஸிங்

சாஸ்கள் மற்றும் சாலட் டிரஸ்ஸிங் உணவுகளுக்கு சுவையைக் கூட்டினாலும், இவற்றிலும் பதப்படுத்திகள் இருக்கும். இவற்றை அதிகம் உட்கொண்டால் அவை செரிமான மண்டலத்தில் பிரச்சனைகளை உண்டாக்கி உடல் சூட்டை அதிகரித்துவிடும்.

9. மதுபானங்கள்

மதுபானங்கள், குறிப்பாக பீர் போன்றவை கோடையில் நீரிழப்பை ஏற்படுத்தும். மேலும், இவை உடலின் வெப்பநிலையை உயர்த்தும். உடல் ஆரோக்கியத்திற்காகவே கோடையில் இவற்றை முற்றிலுமாக தவிர்ப்பது அவசியம்.

10. உப்பு நிறைந்த உணவுகள்

உப்பு அல்லது சோடியம் நிறைந்த உணவுகள் நீரிழப்பை ஏற்படுத்தும். ஊறுகாய், சிப்ஸ் போன்ற அதிக உப்பு உள்ள உணவுகள் உடலில் நீர்ச்சத்தை குறைக்க வழிவகுக்கும். எனவே அவற்றை கோடையில் தவிர்க்கலாம்.

11. மாம்பழம்

மாம்பழம் பிடிக்காதவர்கள் மிகக் குறைவு. 'பழங்களின் அரசன்' என்று அழைக்கப்படும் மாம்பழம் சுவையாக இருந்தாலும், இதில் சர்க்கரை அதிகம். அதனால் உடல் சூட்டை ஏற்படுத்தும் குணமும் இதற்கு உண்டு. வயிற்றுக்கோளாறு போன்றவற்றையும் உண்டாக்கும். எனவே, கோடையில் ஒரு நாளைக்கு ஒரு மாம்பழத்திற்கு மேல் சாப்பிடுவதை தவிர்த்துக்கொள்ளுங்கள்.

12. பாகற்காய்

கசப்புடன் இருக்கும் பாகற்காய் உடலுக்கு நன்மை செய்யும் காயாக இருந்தாலும், வயிற்றில் செரிமானக் கோளாறுகளையும், உடல்சூட்டையும் அதிகரிக்கும் தன்மை கொண்டது. இதனால் சாப்பிட்டவுடன் நெஞ்செரிச்சல் உண்டாகலாம்.

13. ஐஸ்கிரீம்

கோடையில் சுவைக்க ஐஸ்கிரீமைத் தவிர்க்க மனம் வராது. ஆனால், ஐஸ்கிரீமில் பால், சர்க்கரை, க்ரீம் போன்ற பொருட்கள் உள்ளதால், இவை செரிமானமாவதற்கு எடுக்கும் நேரத்தில் உடல் வெப்பநிலை அதிகரிக்கும். அதுமட்டுமின்றி, அடிக்கடி ஐஸ்கிரீம் சாப்பிட்டால் தொண்டை வலி, சளி போன்ற பிரச்சினைகளும் ஏற்படலாம்.

14. முட்டை

முட்டையில் அதிக புரதம் இருப்பதால், அது செரிமானம் ஆக அதிக நேரம் எடுக்கும். அதிக நேரம் உழைக்கும்போது செரிமான மண்டலம் வெப்பத்தை அதிகமாக வெளிப்படுத்தும். இதனால் உடல் சூடு அதிகரிக்கும்.

15. வெங்காயம், பூண்டு

உணவின் சுவையை அதிகரிக்கும் வெங்காயம் மற்றும் பூண்டு ஆகியவையும் உடல் சூட்டை அதிகரிக்கும். நீண்ட காலமாக அவற்றை அளவுக்கு அதிகமாக எடுத்துக்கொண்டால் வயிற்றுக்கோளாறு, நெஞ்செரிச்சல் போன்றவையும் உண்டாகலாம்.

கோடையில் சாப்பிட ஏற்ற உணவுகள்

நீர்ச்சத்து அதிகம் உள்ள வெள்ளரி, தர்பூசணி, இளநீர், மோர், கரும்புச்சாறு போன்றவற்றை கோடையில் அதிகம் சாப்பிடுவது உடல் சூட்டைத் தணிப்பதோடு, நீரிழப்பையும் தடுக்கும். இவை தவிர,

பழங்கள், காய்கறிகள்

சீரக தண்ணீர்

நுங்கு

மண்பானை தண்ணீர்

போன்றவற்றையும் கோடையில் உணவுப் பட்டியலில் சேர்த்துக் கொள்ளலாம்.

உடல் ஆரோக்கியமாக இருக்க வேண்டுமென்றால் எப்போதும் சரிவிகித உணவுமுறையைக் கடைபிடிப்பது அவசியம். குறிப்பாக கோடையில் நாம் உண்ணும் உணவுகளில் அதிக கவனத்துடன் இருக்க வேண்டும்.