அரசு ஊழியர்கள் லஞ்சம் கேட்டால் புகார் தெரிவிக்க தொலைபேசி எண்கள் வெளியீடு

அரசு ஊழியர்கள் தங்கள் அரசு பணியை மேற்கொள்ள லஞ்சம் கேட்டால் புகார் தெரிவிக்க தொலைபேசி எண்கள் வெளியிடப்பட்டுள்ளன.

இது குறித்து, நாமக்கல் மாவட்ட ஊழல் தடுப்பு மற்றும் கண்காணிப்பு பிரிவு போலீஸ் டி.எஸ்.பி. சுபாஷினி வெளியிட்டுள்ள அறிக்கையில், நாமக்கல் மாவட்டத்தில் உள்ள அரசு அலுவலகங்கள், உள்ளாட்சி மற்றும் பொதுத்துறை நிறுவனங்களில் பணியாற்றும் அரசு ஊழியர்கள், தங்களது அரசுப்பணியை மேற்கொள்ள, பொதுமக்களிடம் லஞ்சம் கேட்பதாக அடிக்கடி புகார்கள் வருகின்றன.

நாமக்கல் மாவட்டம், நல்லிபாளையத்தில், திருச்செங்கோடு மெயின் ரோட்டில், நாமக்கல் வடக்கு அரசு மேல்நிலைப்பள்ளிக்கு எதிரில், யுகோ வங்கி மேல் தளத்தில் மாவட்ட ஊழல் தடுப்பு மற்றும் கண்காணிப்பு பிரிவு போலீஸ் அலுவலகம் செயல்படுகிறது. அரசு அலுவலர்கள் யாராவது லஞ்சம் கேட்டால், ஊழல் தடுப்பு பிரிவு டி.எஸ்.பி., சுபாஷினியை, 94981 90735, 94450 48878 என்ற மொபைல் எண்களிலும், இன்ஸ்பெக்டர் நல்லம்மாளை 94450 48933 என்ற மொபைல் எண்ணிலும் தொடர்பு கொண்டு புகார் தெரிவிக்கலாம்.

மேலும், நாமக்கல் ஊழல் தடுப்பு மற்றும் கண்காணிப்பு பிரிவு அலுவலகத்தை, 04286 281331 என்ற தொலைபேசி எண்ணிலும், ஊழல் தடுப்பு மற்றும் கண்காணிப்புத்துறை சென்னை தலைமை அலுவலகத்தை, 044 22321090 என்ற தொலைபேசி எண்ணிலும் தொடர்பு கொண்டு தகவல் தெரிவிக்கலாம். கிடைக்கப்பெறும், தகவல் மற்றும் புகார்களின் அடிப்படையில் உடனடியாக சட்டபூர்வ நடவடிக்கைகள் மேற்கொள்ளப்படும் என அதில் தெரிவிக்கப்பட்டுள்ளது.