கொல்லிமலையில் குடிநீர் பிரச்சினையை தீர்க்க லாரிகள் மூலம் குடிநீர் சப்ளை : ஆட்சியர்..!

நாமக்கல்,

கொல்லிமலையில் ஏற்பட்டுள்ள குடிநீர் தட்டுப்பாட்டை சமாளிக்க, லாரிகள் மூலம் குடிநீர் விநியோகம் செய்ய ஏற்பாடுகள் செய்யப்பட்டுள்ளதாக ஆட்சியர் தெரிவித்தார்.

இது குறித்து, நாமக்கல் மாவட்ட ஆட்சியர் உமா கூறியுள்ளதாவது:

கோடை காலம் துவங்கியுள்ளதால், வாரம் தோறும் திங்கட்கிழமை, உள்ளாட்சி அமைப்புகள், நகராட்சிகள் மற்றும் டவுன் பஞ்சாயத்துகள் ஆகியோருடன் சேர்ந்து, குடிநீர் பிரச்சினையை சமாளிப்பது குறித்து ஆய்வு நடத்தப்பட்டு வருகிறது. அதில், முக்கியமாக மாவட்டத்தில், ஊரகப் பகுதிகளைப் பொருத்தவரை, 322 கிராம பஞ்யாத்துக்களிலும், கொல்லிமலையை தவிர, மற்ற அனைத்து பகுதிகளிலும் கூட்டு குடிநீர் திட்டம் பயன்பாட்டில் உள்ளது.

நகராட்சிகளை பொறுத்தவரை, ராசிபுரத்தை தவிர மற்ற 4 நகராட்சிகள், தங்களது சொந்த நிதி மூலம், காவிரி ஆற்றில் இருந்து நேரடியாக பம்பிங் செய்து குடிநீர் விநியோகம் செய்து வருகின்றனர். அதேபோல், டவுன் பஞ்சாயத்துக்கள் அனைத்தும் காவிரி கூட்டு குடிநீர் திட்டத்தில்தான் உள்ளது. தற்போது, காவிரியில், 1,400 கனஅடி தண்ணீர் வெளியேற்றப்படுகிறது. பொதுமக்களுக்கும், குடிநீரை சிக்கனமாக பயன்படுத்த வேண்டும் என வேண்டுகோள் விடுத்துள்ளோம்.

கொல்லிமலை பகுதியில் ஏற்பட்டுள்ள குடிநீர் பிரச்சினையை தீர்க்க, அங்கு லாரிகள் மூலம் குடிநீர் வினியோகம் செய்யவும் அனுமதி வழங்கி உள்ளோம். மேலும், ரூ. 10 கோடி மதிப்பில் இருக்கின்ற சொந்த நிதியை பயன்படுத்தி குடிநீர் விநியோகத்தை மேம்படுத்த அரசின் அனுமதிக்கு அனுப்பி உள்ளோம்.

மேலும், அந்தந்த ஊரக பகுதியில் இருக்கின்ற பிளாக் பஞ்சாயத்து நிதி, கிராம பஞ்சாயத்து நிதி, 15வது நிதிக்குழு மானியம் என, இருக்கின்றன நிதியை பயன்படுத்தி, பொதுமக்களுக்கு குடிநீர் பிரச்சினை ஏற்படாத வகையில் போர்க்கால அடிப்படையில் நடவடிக்கை எடுக்க வேண்டும் என உத்தரவிட்டுள்ளோம். நமது மாவட்டத்தை பொருத்தவரை குடிநீர்தான் நமக்கு தற்போது முக்கியம். பாசனத்திற்கு நேரடியாக எடுக்கக் கூடிய நீரேற்றுப் பாசன திட்டத்தை தற்காலிகமாக நிறுத்தி உள்ளோம். நீரேற்று பாசன திட்டத்திற்கான மின் இணைப்பை துண்டித்துள்ளோம் என அவர் கூறினார்.