ஸ்ரீவில்லிபுத்தூர் பகுதிகளில் வெள்ள பாதிப்புகளை ஆட்சியர் நேரில் ஆய்வு

ஸ்ரீவில்லிபுத்தூர் வெள்ள பாதிப்பு ஆய்வு செய்த ஆட்சித் தலைவர். இணைப்புச் சாலையை பயன்படுத்த பொதுமக்களுக்கு தடை விதிப்பு.

விருதுநகர் மாவட்டம் ஸ்ரீவில்லிபுத்தூரில் வெள்ள பாதிப்பு மற்றும் கண்மாய்களை ஆய்வு செய்த மாவட்ட ஆட்சித் தலைவர் பிரதான சாலையை பொதுமக்கள் பயன்படுத்த தடை விதித்தார். ஸ்ரீவில்லிபுத்தூரில் கடந்த 2 நாட்களாக பெய்த தொடர் மழை காரணமாக மேற்கு தொடர்ச்சி மலை அடிவாரப் பகுதியில் அமைந்துள்ள மொட்டபத்தான் கண்மாய் கரை உடைந்து நகருக்குள் மழைநீர் புகுந்தது. இதனால் நகரின் மையப்பகுதியான ஒட்டமடம், ஆராய்ச்சிபட்டி தெரு உள்ளிட்ட பகுதிகளில் உள்ள வீடுகளுக்குள் வெள்ள நீர் புகுந்தது. இதனால் பொதுமக்கள் பெரிதும் பாதிப்பு அடைந்தனர். மேலும் ஆயிரம் ஆண்டுகள் பழமையான வைத்தியநாத சுவாமி கோவிலில் மழை நீர் புகுந்ததால் உள் மற்றும் வெளிப்புற பிரகாரங்களில் மழைநீர் தேங்கி நின்றது.

இந்நிலையில் இன்று விருதுநகர் மாவட்ட ஆட்சித்தலைவர் திரு. மேகநாத ரெட்டி மழை பாதித்த பகுதிகளை ஆய்வு செய்தார். குறிப்பாக திருமுக்குளம், பெரியகுளம் கண்மாய் உள்ளிட்ட இடங்களில் ஆய்வு செய்த ஆட்சித்தலைவர் திருமுக்குளம் கரையில் இருக்கும் ஸ்ரீவில்லிபுத்தூரையும் இணைக்கும் சாலையை பொதுமக்கள் பயன்படுத்த தடை விதித்தார். ஸ்ரீவில்லிபுத்தூரிலிருந்து மம்சாபுரம் செல்வோர் நல்ல குற்றாலம் தெரு சந்திப்பு வழியாக செல்ல வேண்டும் என உத்தரவிட்டுள்ளார்.