அரசு பெண் ஊழியரிடம் ஆபாசமாக பேசிய அதிகாரி கைது: பாேலீசார் அதிரடி

அரசு பெண் ஊழியரிடம் ஆபாசமாக பேசி மிரட்டியதோடு, அவர் குறித்து தவறான தகவல் அனுப்பிய, துணை வட்டார வளர்ச்சி அதிகாரியை போலீசார் கைது செய்தனர்.

தஞ்சாவூர் மருத்துவகல்லுாரி சாலையில் உள்ள தமிழ்நகரை சேர்ந்தவர் முருகானந்தவள்ளி,48,. இவர் கலெக்டர் அலுவலகத்தில் உள்ள ஊரக வளர்ச்சி முகமை அலுவலகத்தில் கடந்த 2012ம் ஆண்டு முதல் பணியாற்றி வருகிறார். அப்போது அதே அலுவலகத்தில் தஞ்சை மாரியம்மன்கோவிலை சேர்ந்த விஜயகுமார்,58, என்பவரும் பணியாற்றி வந்துள்ளார்.

தற்போது விஜயகுமார் திருவோணம் யூனியனில், துணை வட்டார வளர்ச்சி அதிகாரியாக பணியாற்றி வருகிறார். 2 பேரும் ஒரே அலுவலத்தில் வேலை பார்த்து வந்ததால், அவர்களிடையே பழக்கம் ஏற்பட்டுள்ளது. இந்த நிலையில் முருகானந்தவள்ளியின் மகளுக்கு திருமணம் நிச்சயம் செய்துள்ளனர். இந்த நிச்சயதார்த்தம் குறித்து விஜயகுமாரிடம் சொல்லவில்லை என கூறப்படுகிறது.

இந்த தகவல் அறிந்த விஜயகுமார், கடந்த சிலநாட்களுக்கு முன்பு, கலெக்டர் அலுவலகத்திற்கு வந்து, முருகானந்தவள்ளியிடம், கேட்டுள்ளார். அப்போது இரண்டு பேருக்கும் இடையே வாய்த்தகராறு ஏற்பட்டுள்ளது. அப்போது விஜயகுமார் ஆபாசமாக திட்டியுள்ளார்.

இதற்கிடையில், விஜயகுமார், முருகானந்தவள்ளியின் மகள் மற்றும் அவரது உறவினர்களுக்கு, முருகானந்தவள்ளிக்கும் வேறு நபருக்கும் தொடர்பு இருப்பதாக எஸ்.எம்.எஸ். அனுப்பியுள்ளார். இது முருகானந்தவள்ளிக்கு தெரிய வந்ததும் அதிர்ச்சி அடைந்தார்.

இது தொடர்பாக விஜயகுமாரிடம், முருகானந்தவள்ளி கேட்ட போது, திட்டியுள்ளார். இதையடுத்து முருகானந்தவள்ளி, தஞ்சை மருத்துவகல்லுாரி போலீசில் புகார் அளித்தார். புகாரின் பேரில், வழக்குப்பதிவு செய்த போலீசார் விஜயகுமாரை கைது செய்தனர்.