நாமக்கல் மாவட்ட உள்ளாட்சி இடைத்தேர்தல் பணிகள்: தேர்தல் பார்வையாளர் நேரில் ஆய்வு

நாமக்கல் மாவட்டத்தில் காலியாக உள்ள 25 இடங்களக்கு உள்ளாட்சி இடைத்தேர்தல் அறிவிக்கப்பட்டது. இதில் 10 இடங்களுக்கு போட்டியின்றி தேர்வு செய்யப்பட்டனர். மீதமுள்ள 15 உள்ளாட்சி பதவியிடங்களுக்கு அக். 9ம் தேதி தேர்தல் நடைபெறுகிறது. இதில் 63 பேர் போட்டியிடுகின்றனர். தேர்தலுக்கான முன்னேற்பாட்டுப் பணிகள் தீவிரமாக நடைபெற்று வருகின்றன. இந்தத் தேர்தலில் பயன்படுத்த உள்ள வாக்குப்பெட்டிகள், வாக்கு எண்ணிக்கை மையங்களை, தேர்தல் கமிஷனர் சிவசண்முக ராஜா, மாவட்ட கலெக்டர் ஸ்ரேயாசிங் ஆகியோர் நேரில் சென்று பார்வையிட்டு ஆய்வு செய்தனர்.

மாவட்டத்தில் உள்ளாட்சி இடைத்தேர்தலுக்காக, மொத்தம் 159 வாக்குச்சாவடிகள் ஏற்படுத்தப்பட்டுள்ளன. 36,299 ஆண் வாக்காளர்கள், 37,732 பெண் வாக்காளர்கள், 6 திருநங்கைகள் என மொத்தம் 74,037 பேர் வாக்களிக்க உள்ளனர். தேர்தலில் வாக்குப் பதிவு இயந்திரம் கிடையாது. வாக்குச்சீட்டு முறை பயன்படுத்தப்படுகிறது. இதனால் வாக்குப்பெட்டிகள் தயார் செய்யம் பணி நடைபெற்று வருகிறது. வாக்குப்பெட்டிகளையும் தேர்தல் பார்வையாளர் மற்றும் கலெக்டர் ஆகியோர் பார்வையிட்டனர்.

வெண்ணந்தூர் ஒன்றியத்தில், மாவட்ட ஊராட்சிக் குழு 6-வது வார்டு உறுப்பினர் பதவிக்கு 12 பேர் போட்டியிடுகின்றனர். எருமப்பட்டி ஊராட்சி ஒன்றியக் குழு உறுப்பினர் பதவிக்கு 8 பேர் போட்டியிடுகின்றனர். ஆவல்நாயக்கன்பட்டி, நடுக்கோம்பை பஞ்சாயத்து தலைவர்கள் போட்டியின்றி தேர்வாகி விட்டதால் குப்பனாம்பாளையம், திம்மநாயக்கன்பட்டி, கூடச்சேரி ஆகிய 3 பஞ்சாயத்து தலைவர் பதவிகளுக்கு 14 பேர் போட்டியிடுகின்றனர். 18 கிராம பஞ்சாயத்து வார்டு உறுப்பினர் பதவிக்கான தேர்தலில் 8 பேர் போட்டியின்றி தேர்வாகி உள்ளனர். மீதமுள்ள 10 உறுப்பினர் பதவிக்கு 29 பேர் போட்டியிடுகின்றனர். மொத்தமுள்ள 15 பதவிகளுக்கு 63 பேர் களத்தில் உள்ளனர். வரும் 9ம் தேதி காலை 7 மணிக்கு தொடங்கி வாக்குப் பதிவு நடைபெறுகிறது.