திமுக கூட்டணி நிச்சயம் உடையும்-எல்.முருகன்

தமிழகத்தில் திமுக கூட்டணி நிச்சயம் உடையும் என பாஜக மாநில தலைவர் எல்.முருகன் கூறினார்.

மதுரை தெற்கு தொகுதிக்குட்பட்ட காமராசர் சாலை பகுதியில் பாஜக சார்பில் தெற்கு சட்டமன்ற தொகுதி அலுவலகத்தை பாஜக மாநில தலைவர் எல்.முருகன் திறந்து வைத்தார். பின்னர் செய்தியாளர்களிடம் கூறியதாவது,நாராயணசாமியின் இயலாமையால் புதுச்சேரியில் காங்கிரஸ் ஆட்சி கவிழ்ந்துள்ளது, காங்கிரஸ் கட்சி தற்போது இந்தியாவில் இல்லை , ஒரு சில இடங்களில் மட்டும் உள்ளது. தமிழகத்திற்கு ராகுல்காந்தி வந்து சென்றதால் தமிழகத்திலும் காங்கிரஸ் அழிந்து போகும், ஸ்டாலின் திமுகவை நடத்துவது அக்கட்சி நிர்வாகிகளுக்கே பிடிக்கவில்லை.

பெட்ரோல் டீசல் விலை உயர்வு என்பது உலகநாடுகள் பிரச்சனை. அதை குறைக்க வழிவகை செய்வோம்.பெட்ரோல் டீசல் விலை உயர்வு என்பது கடந்த ஆட்சியில் இருந்தது போல நிலை தான் உள்ளது. ராகுல் செல்லும் இடங்களில் எல்லாம் இனி காங்கிரஸ் கட்சிக்கு தோல்வி தான்.வரும் 25ம் தேதி கோவையில் பிரதமர் தலைமையில் நடைபெறும் மாநாட்டிற்கு கூட்டணி கட்சிகளுக்கு அழைப்பு விடுக்கவில்லை. வேளாண் சட்டத்தை முன்மொழிந்ததே காங்கிரஸ் கட்சி தான். எடப்பாடி பழனிச்சாமி செயல்படுத்தவுள்ளதை முன்னரே தெரிந்து ஸ்டாலின் அறிவிப்புகளை வெளியிடுகிறார். தமிழகத்தில் திமுக கூட்டணி நிச்சயம் உடையும் அதற்கான சாத்தியகூறு உள்ளது என்றார்.