திருச்சி சரகத்தில் திருடர்களிடமிருந்து 60 ஆடுகளை மீட்டது தனிப்படை

திருச்சி மத்திய மண்டல காவல்துறைத் தலைவர் (ஐ.ஜி) பாலகிருஷ்ணன் அறிவுறுத்தலின் பேரில் திருச்சி சரக காவல்துறை துணைத்தலைவர் (டி.ஐ.ஜி) சரவணசுந்தர் மேற்பார்வையில் கடந்த 23-11-2021-ந் தேதி ஆடு திருடும் நபர்களை பிடிப்பதற்காக 1 உதவி ஆய்வாளர் தலைமையில் 3 காவலர்களை உள்ளடக்கிய தனிப்படை திருச்சி சரக அளவில் அமைக்கப்பட்டது.

மேலும் அனைத்து மாவட்டங்களிலும் ஆடு திருடும் கும்பல் மீது நடவடிக்கை எடுக்க அறிவுறுத்தப்பட்டது. இந்நிலையில் கடந்த 6 நாட்களில் (23-ந்தேதி முதல் 28-ந்தேதி வரை) திருச்சி சரகத்திற்குட்பட்ட திருச்சி, புதுக்கோட்டை மற்றும் கரூர் ஆகிய மாவட்டங்களில் ஆடு திருட்டு சம்பந்தமாக மொத்தம் 12 வழக்குகள் (திருச்சி -3, புதுக்கோட்டை - 8, கரூர்- 1) பதிவு செய்யப்பட்டு 4 குற்றவாளிகள் கைது செய்யப்பட்டு அவர்களிடமிருந்து சுமார் 3 லட்சம் மதிப்புள்ள 60 ஆடுகள் மீட்கப்பட்டு நீதிமன்றம் மூலம் உரியவர்களிடம் ஒப்படைக்கப்பட்டு, குற்றவாளிகள் நீதிமன்ற காவலுக்கு அனுப்பப்பட்டுள்ளனர்.

மேலும் ஆடு திருடுபவர்களை தொடர்ந்து கண்காணித்து நடவடிக்கை எடுக்க திருச்சி சரக தனிப்படையினருக்கு அறிவுறுத்தப்பட்டுள்ளது.