திருவாரூர் மாவட்ட அரசு இசைப்பள்ளி மாணவியருக்கான சேர்க்கை துவக்கம்

திருவாரூர் மாவட்டத்தில் அரசு இசைப்பள்ளி பிளாட் 41, வாசன் நகர், திருவாரூர் என்ற முகவரியில் இயங்கி வருகிறது. தமிழக அரசின் கலைப்பண்பாட்டுத்துறையின் கீழ் இயங்கி வரும் இந்த இசைப்பள்ளியில் குரலிசை, நாதஸ்வரம், தவில், தேவாரம், பரதநாட்டியம், வயலின் மற்றும் மிருதங்கம் ஆகிய கலைகள் மிகச்சிறப்பாக மூன்று வருட முழு நேர பயிற்சி அளிக்கப்பட்டு தமிழக அரசின் சான்றிதழ் வழங்கப்பட்டு வருகிறது.

இப்பள்ளியில் பயிலும் மாணாக்கர்களுக்கு அரசு விதிகளின்படி இலவச விடுதி வசதி, கல்வி உதவித்தொகை, இலவச பேருந்து கட்டண சலுகைகள் மற்றும் மாதந்தோறும் கல்வி ஊக்கத்தொகை ரூ.400 - (ரூபாய் நானூறு மட்டும்) வழங்கப்பட்டு வருகிறது. இப்பள்ளியில் சேர்வதற்கு 12 முதல் 25 வயதிற்குட்பட்டவராக இருக்க வேண்டும். குரலிசை, பரதநாட்டியம், வயலின், மிருதங்கம் ஆகிய கலைகளுக்கு 7ஆம் வகுப்பு தேர்ச்சி பெற்றிருந்தால் போதுமானது.

நாதஸ்வரம், தவில், தேவாரம் ஆகிய கலைகளுக்கு தமிழ் எழுத, படிக்க தெரிந்தால் போதுமானது. ஆண்டு ஒன்றுக்கு கல்வி கட்டணம் ரூ. 152- செலுத்தவேண்டும். தற்போது மாணவ, மாணவியர் சேர்க்கை நடைபெற்று வருகிறது. ஆண் மற்றும் பெண் இருபாலரும் சேரலாம். மேற்கண்ட தகுதியுடைய நபர்கள் மேலும் விவரங்களுக்கு பள்ளி தலைமை ஆசிரியர், மாவட்ட அரசு இசைப்பள்ளி, திருவாரூர் என்ற முகவரியில் அணுகுமாறு மாவட்ட ஆட்சியர் காயத்ரி கிருஷ்ணன் தெரிவித்துள்ளார்.