பெண்ணை கொன்று உடலை கிணற்றில் வீசிய மளிகைக்கடை உரிமையாளர் கைது

நாமக்கல் ரோஜா நகரில், கடந்த 22-ந் தேதி தனியார் நிலத்தில் உள்ள கிணற்றில், அழுகிய நிலையில் பெண் சடலம் மீட்கப்பட்டது. அவர் யார், எப்படி இறந்தார் என்பது குறித்து நாமக்கல் போலீசார் தீவிர விசாரணை நடத்தி வந்தனர். அப்போது கிடைத்த அளித்த தகவலின் அடிப்படையில், என்.கொசவம்பட்டியில் வசித்த கணவரை இழந்த லலிதா (40) என்பவர், சில நாட்களுக்கு முன்பு காணாமல் போனது தெரியவந்தது. இது குறித்து போலீசார் விசாரணை செய்தனர்.

இதில், அதே பகுதியை சேர்ந்த மளிகைக்கடை உரிமையாளர் சுரேந்திரன் (25) என்பவர், கடந்த நவம்பர் மாதம் 15-ந் தேதி, லலிதாவை காரில் அழைத்துச் சென்றது தெரியவந்தது. சுரேந்திரனிடம் போலீசார் விசாரணை நடத்தினர். விசாரணையில் சுரேந்திரன் கொசவம்பட்டியில் மளிகைக்கடை நடத்தி வருவதும், அதற்கு லலிதா பணம் கொடுத்து உதவி செய்ததும் தெரியவந்தது. இருவரும் நெருங்கி பழகி, அடிக்கடி உல்லாசமாக இருந்ததும் தெரியவந்தது. லலிதா கொடுத்த பணத்தை திருப்பிக் கேட்டுள்ளார். சுரேந்திரன் பணத்தை திருப்பிக் கொடுக்கவில்லை. சம்பவத்தன்று லலிதாவை காரில் அழைத்துச் சென்ற சுரேந்திரன், அவரை அடித்துக் கொலை செய்தது தெரியவந்தது.

மேலும், லலிதா அணிந்திருந்த தங்க செயின் மற்றும் தோடு ஆகியவற்றை எடுத்துக் கொண்டு லலிதாவின் உடலை பிளாஸ்டிக் சாக்குப்பையில் கட்டி, நாமக்கல், ரோஜா நகரில் ரோடு ஓரம் இருந்த கிணற்றில் வீசியது தெரியவந்தது. இதையடுத்து சுரேந்திரனை போலீசார் கைது செய்தனர். அவரிடம் இருந்து, லலிதாவுக்கு சொந்தமான மூன்றரை பவுன் தங்கச்செயின் மற்றும் தோடு ஆகியவற்றை போலீசார் பறிமுதல் செய்தனர். லலிதாவை கடத்திச் செல்ல பயன்படுத்திய காரும் பறிமுதல் செய்யப்பட்டது.