ஜல்லிக்கட்டுக்கு அனுமதிகோரி ஆட்சியர் அலுவலகத்தை முற்றுகையிட்ட கிராம மக்கள்

நாமக்கல் மாவட்டம் எருமப்பட்டி ஒன்றியத்துக்கு உட்பட்ட ரெட்டிப்பட்டி ஊராட்சி சாலப்பாளையம் கிராமத்தில் பொங்கல் பண்டிகையை முன்னிட்டு ஜல்லிக்கட்டு போட்டி நடத்துவதற்காக கிராம மக்கள் முடிவு செய்தனர்.

ஜல்லிக்கட்டு போட்டி நடத்த ஏற்கனவே பல முறை அனுமதி கேட்டு, மாவட்ட கலெக்டர் அலுவலகத்தில் மனு கொடுத்தும் இதுவரையில் அனுமதி வழங்கப்படவில்லை. இதைக் கண்டித்தும், உடனடியாக ஜல்லிக்கட்டு போட்ட நடத்த அனுமதி வழங்கக் கோரியும், மாவட்ட கலெக்டர் அலுவலகம் முன்பு பஞ்சாயத்து தலைவர் ராஜா தலைமையில் 70க்கும் மேற்பட்டோர் தரையில் அமர்ந்து தர்ணா போராட்டம் நடத்தினர்

இந்தப் பகுதியில் ஏராளமான விவசாயிகள் உள்ளனர். ரெட்டிபட்டி பஞ்சாயத்தில் பல ஆண்டுகளுக்குப்பிறகு முதன்முறையாக ஜல்லிக்கட்டு நடத்த அனுமதி கேட்டிருந்தனர். ஆனால் கடந்த ஆட்சியில் அனுமதி மறுக்கப்பட்ட நிலையில், தற்போது பஞ்சாயத்து தலைவர் ராஜா தலைமையில் மக்கள் குறைதீர்க்கும் நாள் முகாமில் மனுக்களை கொடுத்தனர்.

மாவட்ட நிர்வாகம் இதுவரையில் அவர்களுக்கு அனுமதி வழங்கவில்லை இதனைக் கண்டித்து, கலெக்டர் அலுவலகத்தை திரளான பொதுமக்கள் முற்றுகையிட்டு தர்ணா போராட்டத்தில் ஈடுபட்டனர். அவர்களிடம் பேச்சுவார்த்தை நடத்திய வருவாய்த்துறை அதிகாரிகள் விரைவில் ஜல்லிக்கட்டு போட்டி நடத்தி அனுமதி வழங்க நடவடிக்கை எடுக்கப்படும் என்று உறுதியளித்தனர். இதைத்தொடர்ந்து அவர்கள் போராட்டத்தை கைவிட்டு கலைந்து சென்றனர்.