காவிரி-திருமணி முத்தாறு - சரபங்கா நதிகளை இணைக்க வலியுறுத்தி நாமக்கல்லில் மாரத்தான் ஓட்டம்...

இந்திய அரசியல் நிர்ண சாபையில் உறுப்பினராகவும், இந்தியாவின் முதலாவது நாடாளுமன்றத்தில் உறுப்பினராகவும், தமிழகத்தில் எம்எல்ஏ, எம்எல்சி, எதிர்க்கட்சித் தலைவர், சேலம் ஒருங்கிணைந்த மாவட்ட நாட்டாண்மைக் கழகத் தலைவர் போன்ற பல்வேறு பதவிகளை வகித்தவர் திருச்செங்கோடு டி.எம். காளியண்ணன். இவர் பதவியில் இருந்தபோது காவிரியில் வரும் உபரிநீரை, திருமணி முத்தாறு, சரபங்கா ஆகிய நதிகளுடன் இணைத்து, சேலம், நாமக்கல் மாவட்ட விவசாயிகளுக்கு பேருதவி செய்ய வேண்டும் என்ற முக்கிய நோக்கத்தை கொண்டு செயல்பட்டார்.

இதுவரை அந்த திட்டம் நிறைவேறவில்லை. இதை வலியுறுத்தி, நாமக்கல் பரமத்தி சாலையில் உள்ள கொங்கு திருமண மண்டபம் அருகில் இருந்து நாமக்கல் மாரத்தான் ஓட்டம் இன்று நடைபெற்றது. நாமக்கல் கொங்குநாட்டு வேளாளர் சங்க தலைவர் வெங்கடாசலம் நிகழ்ச்சிக்கு தலைமை வகித்தார். டிஎம் காளியண்ணன் பவுண்டேசன் நிறுவனத்தலைவர் டாக்டர் செந்தில் முன்னிலை வகித்தார்.

சென்னை உயர் நீதிமன்ற வழக்கறிஞரும், காளியண்ணனின் மகனுமான ராஜேஸ்வரன் மாரத்தான் ஓட்டத்தை துவக்கி வைத்தார். 5 வயதுக்கு உட்பட்ட குழந்தைகளுக்கு 2 கிலோ மீட்டர் தொலைவு, பெண்களுக்கு 5 கிலோ மீட்டர், பெரியவர்களுக்கு 10 கிலோ மீட்டர் என்ற முறையில் 3 பிரிவுகளாக மாரத்தான் ஓட்டம் நடைபெற்றது. நாமக்கல் கொங்கு மண்டபத்தில் இருந்து வள்ளிபுரம் வரை இதற்கான இடம் தேர்வு செய்யப்பட்டு மீண்டும் கொங்கு திருமண மண்டபத்தில் நிறைவு பெற்றது. ஓட்டத்தில் கலந்துகொள்வதற்காக ஆன்லைன் மூலம் பதிவு செய்த சுமார் 1,000 க்கும் மேற்பட்ட மாணவ மாணவிகளும் பொதுமக்களும் மாரத்தானில் கலந்துகொண்டனர்.

தொடர்ந்து, நாமக்கல் கொங்குநாட்டு வேளாளர் சங்கத்தின் 50ஆவது ஆண்டு துவக்க விழா, தியாகி டி.எம்.காளியண்ணன் 103 ஆவது பிறந்த நாள் நாமக்கல் கொங்கு திருமண மண்டபத்தில் நடைபெற்றது. பாண்டிச்சேரி பொதுப்பணித்துறை அமைச்சர் லட்சுமி நாராயணன், நாமக்கல் எம்எல்ஏ ராமலிங்கம், திருச்சி காங்கிரஸ் பிரமுகர் வேலுசாமி, நாமக்கல் நகராட்சித் தலைவர் காலநிதி உள்ளிட்ட பலர் விழாவில் கலந்துகொண்டு பேசினார்கள்.

மாரத்தான் ஓட்டத்தில் ஒவ்வொரு பிரிவிலும் முதல் 10 இடங்களைப் பெற்றவர்களுக்கு பரிசுகள் வழங்கப்பட்டன. முடிவில் கொங்குநாட்டு வேளாளர் சங்க பொருளாளர் அருட்செல்வி நன்றி கூறினார்.