மழை பாதிப்பு: விவசாயிகளுக்கு ரூ.85.50 லட்சம் வழங்கிய அமைச்சர் மதிவேந்தன்

கடந்த ஆண்டு, நாமக்கல் மாவட்டத்தில் பெய்த வடகிழக்கு பருவமழையால், 109.88 ஹெக்டேர் பரப்பில் பயிர் செய்யப்பட்ட, வேளாண் பயிர்களான நெல், சோளம், பருத்தி, மக்காச்சோளம், கரும்பு, உளுந்து, தென்னை மரம் போன்றவை சேதமடைந்தது. இதனால் 221 விவசாயிகள் பாதிக்கப்பட்டனர். இதேபோல் தோட்டக்கலை பயிர்களான வெங்காயம், மரவள்ளி, பப்பாளி, பல்லாண்டு பயிரான முருங்கை, கொடிவகை காய்கறிகள் மற்றும் பாக்கு மரம் என 599.6 ஹெக்டேர் பரப்பில் சேதமடைந்து, 1016 விவசாயிகள் பாதிக்கப்பட்டனர்.

இதைத் தொடர்ந்து தமிழக அரசு பாதிக்கப்பட்ட வேளாண் பயிரான நெல் மற்றும் தோட்டக்கலை பயிர்களுக்கு மாநில பேரிடர் நிவாரண நிதியில் இருந்து ஒரு ஹெக்டேருக்கு ரூ.13,500 மற்றும் கூடுதலாக மாநில நிதியில் இருந்து ஒரு ஹெக்டேருக்கு ரூ.6,500 என மொத்தம் ஒரு ஹெக்டேருக்கு ரூ.20 ஆயிரம் வீதம் வழங்க உத்தரவிட்டுள்ளது. பல்லாண்டு பயிர்களுக்கு மாநில பேரிடர் நிவாரண நிதியில் இருந்து ஒரு ஹெக்டேருக்கு ரூ.18 ஆயிரம் மற்றும் கூடுதலாக மாநில நிதியில் இருந்து ஒரு ஹெக்டேருக்கு ரூ.7 ஆயிரம் என மொத்தம் ஒரு ஹெக்டேருக்கு ரூ.25 ஆயிரம் வழங்க உத்தரவிட்டு உள்ளது.

இதையொட்டி, பாதிக்கப்பட்ட விவசாயிகளுக்கு நிவாரணம் வழங்கும் நிகழ்ச்சி கலெக்டர் அலுவலகத்தில் நடந்தது. கலெக்டர் ஸ்ரேயா சிங் நிகழ்ச்சிக்கு தலைமை வகித்தார். எம்.பி.க்கள் ராஜேஷ்குமார், சின்ராஜ், எம்எல்ஏக்கள் ராமலிங்கம், பொன்னுசாமி ஆகியோர் முன்னிலை வகித்தனர். சுற்றுலாத்துறை அமைச்சர் டாக்டர் மதிவேந்தன் நிகழ்ச்சியில் கலந்து கொண்டு மழையால் பயிர் பாதிக்கப்பட்ட விவசாயிகளுக்கு நிவாரண தொகையை வழங்கி பேசினார்.

அப்போது அவர், வடகிழக்கு பருவமழையால் பாதிக்கப்பட்ட 916 விவசாயிகளுக்கு தற்போது முதல்கட்டமாக ரூ.85 லட்சத்து 57 ஆயிரம் வழங்கப்பட்டுள்ளது. மீதமுள்ள விவசாயிகளுக்கு விரைவில் ரூ.31 லட்சம் வழங்கப்பட உள்ளது என்றார். நிகழ்ச்சியில் வேளாண்மை இணை இயக்குனர் அசோகன், தோட்டக்கலைத்துறை துணை இயக்குனர் கணேசன், பிஆர்ஓ சீனிவாசன் மற்றும் அலுவலர்கள் கலந்து கொண்டனர்.