வியாசர்பாடியில் கத்தியை காட்டி பொதுமக்களை அச்சுறுத்திய ரவுடி கைது

சென்னை எம்.கே.பி. நகர் காவல் நிலையத்திற்கு உட்பட்ட உதயசூரியன் நகர் பூங்கா அருகே மர்ம நபர் ஒருவர் கத்தியை காட்டி பொதுமக்களை அச்சுறுத்துவதாக எம்.கே.பி. நகர் போலீசாருக்கு ரகசிய தகவல் கிடைத்தது. அதன்பேரில் சம்பவ இடத்திற்குச் சென்ற எம்.கே.பி. நகர் சப் இன்ஸ்பெக்டர் மனோஜ் உள்ளிட்ட போலீசார் அங்கு குடி போதையில் கத்தியுடன் நின்று கொண்டிருந்த நபரை பிடித்து விசாரணை செய்தனர்.

விசாரணையில் அவர் கொடுங்கையூர் சுப்பிரமணி தெரு பகுதியை சேர்ந்த யோகேஷ் என்கின்ற காளியா(வயது 23 )என்பதும் இவர் மீது ஏற்கனவே எம்.கே.பி. நகர் வியாசர்பாடி கொடுங்கையூர் ஆகிய காவல் நிலையங்களில் பல்வேறு வழக்குகள் இருப்பதும் தெரியவந்தது. இதனையடுத்து எம்.கே.பி. நகர் போலீசார் அவரை காவல் நிலையம் அழைத்து வந்து விசாரணை செய்து அவர் மீது வழக்குப் பதிவு செய்து நீதிமன்றத்தில் ஆஜர்படுத்தி சிறையில் அடைத்தனர். மேலும் அவரிடம் இருந்து சுமார் ஒன்றரை அடி நீளமுள்ள கத்தியையும் பறிமுதல் செய்தனர்.