508 நிலையங்கள், 27 மாநிலங்கள்: ரயில்வேயின் பெரிய சீரமைப்புத் திட்டத்தை தொடங்கி வைத்த பிரதமர்

நாடு முழுவதும் முக்கிய ரயில் நிலையங்களை உலக தரத்தில் பல்வேறு வசதிகளுடன் மேம்படுத்த ரயில்வே அமைச்சகம் முடிவு செய்துள்ளது. இதன்படி 'அம்ரித் பாரத்' ரயில் நிலையங்கள் என்ற திட்டம் உருவாக்கப்பட்டு இதன்கீழ் முக்கிய ரயில் நிலையங்களில் பயணிகளுக்கு தேவையான அடிப்படை வசதிகள் செய்து கொடுக்கப்பட இருக்கின்றன. அதே நேரத்தில் இந்த ரயில் நிலையங்கள் புதுப்பொலிவும் பெற போகின்றன.

இந்தியா முழுவதும் 508 ரயில் நிலையங்கள் ரூ.24 ஆயிரத்து 470 கோடியில் மேம்படுத்தப்பட உள்ளன. தெற்கு ரயில்வேக்கு உட்பட்ட 25 ரெயில் நிலையங்களும் இந்த திட்டத்தின் கீழ் சீரமைக்கப்பட உள்ளன.

இந்த 508 நிலையங்கள் உத்தரபிரதேசம் மற்றும் ராஜஸ்தானில் தலா 55, பீகாரில் 49, மகாராஷ்டிராவில் 44, மேற்கு வங்கத்தில் 37, மத்தியப் பிரதேசத்தில் 34, அசாமில் 32, ஒடிசாவில் 25, பஞ்சாபில் 22, குஜராத் மற்றும் தெலுங்கானாவில் தலா 21, ஜார்கண்டில் 20, ஆந்திரா மற்றும் தமிழ்நாட்டில் தலா 18 என 27 மாநிலங்கள் மற்றும் யூனியன் பிரதேசங்களில் உள்ளன என பிரதமர் அலுவலகம் தெரிவித்துள்ளது. ஹரியானாவில் 15 நிலையங்களும், கர்நாடகாவில் 13 நிலையங்களும் உள்ளன.

ரூ. 24,470 கோடி செலவில் மேற்கொள்ளப்படும் இந்த மறுவடிவமைப்பு, பயணிகளுக்கு நவீன வசதிகளை வழங்குவதோடு, நன்கு வடிவமைக்கப்பட்ட போக்குவரத்து சுழற்சி, மாடல்களுக்கு இடையேயான ஒருங்கிணைப்பு மற்றும் பயணிகளின் வழிகாட்டுதலுக்காக நன்கு வடிவமைக்கப்பட்ட பலகைகளை உறுதி செய்யும் என்று பிரதமர் அலுவலகம் ஒரு அறிக்கையில் தெரிவித்துள்ளது. நிலைய கட்டிடங்கள் உள்ளூர் கலாச்சாரம், பாரம்பரியம் மற்றும் கட்டிடக்கலை ஆகியவற்றால் ஈர்க்கப்படும்.

அதிநவீன பொதுப் போக்குவரத்தை வழங்குவது குறித்து பிரதமர் மோடி அடிக்கடி வலியுறுத்தி வருவதையும், ரயில்தான் மக்களின் விருப்பமான போக்குவரத்து முறை என்பதையும் குறிப்பிட்டுள்ள பிரதமர் அலுவலகம், ரயில் நிலையங்களில் உலகத் தரம் வாய்ந்த வசதிகளை வழங்குவதற்கு முன்னுரிமை அளித்துள்ளதாகக் கூறியுள்ளது. .

இந்த தொலைநோக்கு பார்வையால், 1,309 நிலையங்களை மறுவடிவமைப்பதற்காக 'அமிர்த பாரத் ஸ்டேஷன் திட்டம்' தொடங்கப்பட்டது.

இத்திட்டத்தின் ஒரு பகுதியாக, 508 நிலையங்களை மறுவடிவமைப்பு செய்வதற்கான அடிக்கல்லை பிரதமர் நாட்டினார்.

தமிழகத்தில் முதல் கட்டமாக செங்கல்பட்டு, பெரம்பூர், கூடுவாஞ்சேரி, திருவள்ளூர், திருத்தணி, கும்மிடிப்பூண்டி, அரக்கோணம், ஜோலார்பேட்டை, சேலம், கரூர், திருப்பூர், போத்தனூர், தென்காசி, விருதுநகர், மயிலாடுதுறை, தஞ்சை, விழுப்புரம், நாகர்கோவில் ஆகிய 18 ரெயில் நிலையங்களில் அம்ரித் பாரத் திட்டத்தின் கீழ் பல்வேறு பணிகள் மேற்கொள்ளப்பட உள்ளன.