பிரதமர் மோடியின் 2022 சுதந்திர தின உரையின் முக்கிய அம்சங்கள்

இந்த சுதந்திர தினத்தில் அனைத்து இந்தியர்களுக்கும், இந்தியாவை நேசிப்பவர்களுக்கும் எனது வாழ்த்துகளைத் தெரிவித்துக் கொள்கிறேன். புதிய தீர்மானத்துடன் புதிய திசையை நோக்கி அடியெடுத்து வைக்கும் நாள். இந்தியாவின் கொடி இப்போது உலகம் முழுவதும் பறக்கிறது.

சுதந்திரம் அடைய தங்கள் இன்னுயிரை ஈந்த மகாத்மா காந்தி, நேதாஜி சுபாஷ் சந்திரபோஸ், பாபாசாகேப் அம்பேத்கர் மற்றும் வீர் சாவர்க்கர் ஆகியோருக்கு நாட்டு மக்கள் நன்றி தெரிவித்துக் கொள்கிறார்கள். மங்கள் பாண்டே, தாத்யா தோபே, பகத் சிங், சுக்தேவ், ராஜ்குரு, சந்திரசேகர் ஆசாத், அஷ்பகுல்லா கான், ராம் பிரசாத் பிஸ்மில் மற்றும் ஆங்கிலேயர் ஆட்சியின் அடித்தளத்தை அசைத்த நமது எண்ணற்ற புரட்சியாளர்களுக்கு இந்த தேசம் நன்றி கூறுகிறது.

சுதந்திரப் போராட்டத்தைப் பற்றிப் பேசும்போது பழங்குடியின சமூகத்தை மறக்க முடியாது. பகவான் பிர்சா முண்டா , சித்து-கன்ஹு, அல்லூரி சீதாராம ராஜு, கோவிந்த் குரு - சுதந்திரப் போராட்டத்தின் குரலாக மாறி, பழங்குடியின சமூகத்தை நாட்டிற்காக வாழவும் இறக்கவும் தூண்டிய எண்ணற்ற பெயர்கள் உள்ளன.

இந்தியா ஜனநாயகத்தின் தாய். கடந்த 75 ஆண்டுகளில் இந்தியா பல ஏற்ற தாழ்வுகளை கண்டுள்ளது. இந்த ஆண்டுகளில் துக்கங்களும் சாதனைகளும் உள்ளன. நாம் இயற்கை சீற்றங்கள், போர்கள் மற்றும் பிற பிரச்சனைகளை எதிர்கொண்டோம். ஆனால் வேற்றுமையில் ஒற்றுமை என்பது நமக்கு வழிகாட்டும் சக்தியாக மாறியது.

2014ல், நாட்டை வழிநடத்தும் பொறுப்பை, நாட்டுமக்கள் எனக்கு அளித்தனர். சுதந்திரத்திற்குப் பிறகு பிறந்த முதல் நபர், இந்த செங்கோட்டையில் இருந்து நாட்டு மக்களுக்கு உரையாற்றும் வாய்ப்பைப் பெற்ற முதல் நபர் நான். 'ஹர் கர் திரங்கா' பிரச்சாரம், நமது புகழ்பெற்ற நாட்டின் உணர்வைக் கொண்டாடுவதற்கு ஒட்டுமொத்த தேசமும் ஒன்று கூடுவதற்கு ஒரு எடுத்துக்காட்டு.

வரும் ஆண்டுகளில், நாம் பஞ்சபிரான் (ஐந்து வாக்குறுதிகள்) மீது கவனம் செலுத்த வேண்டும்.

• முதலில், பெரிய தீர்மானங்கள் மற்றும் வளர்ந்த இந்தியாவின் உறுதியுடன் முன்னேற வேண்டும்.
• இரண்டாவது, அடிமைத்தனத்தின் அனைத்து தடயங்களையும் அழிக்கவும்
• மூன்றாவதாக, நமது பாரம்பரியத்தைப் பற்றி பெருமிதம் கொள்ளுங்கள்.
• நான்காவது, நமது ஒற்றுமையின் பலத்தில் கவனம் செலுத்துங்கள்
• ஐந்தாவது, குடிமக்களின் கடமைகளை நேர்மையுடன் நிறைவேற்ற வேண்டும்,

அதை பிரதமர் மற்றும் முதலமைச்சர்களும் செய்ய வேண்டும்.

75 ஆண்டுகளுக்குப் பிறகு, சுதந்திர தின துப்பாக்கி வணக்கத்தின் போது இந்தியாவில் தயாரிக்கப்பட்ட ஆயுதத்தின் பெருமைமிக்க ஒலியைக் கேட்டோம். இந்த சாதனைக்காக ராணுவ வீரர்களுக்கு நான் தலை வணங்குகிறேன். இறக்குமதி செய்யப்பட்ட பொம்மைகளை வேண்டாம் என்று சொல்லும் குழந்தைகளுக்கும் வணக்கம். ஒரு 5 வயது சிறுவன் விதேஷி வேண்டாம் என்று கூறும்போது , அவனது நரம்புகளில் ஆத்ம நிர்பார் பாரதம் ஓடுகிறது.

லால் பகதூர் சாஸ்திரியின் "ஜெய் ஜவான், ஜெய் கிசான்" என்ற முழக்கத்தை நாம் எப்போதும் நினைவில் கொள்கிறோம். பின்னர், வாஜ்பாய் இந்த முழக்கத்துடன் "ஜெய் விக்யான்" சேர்த்தார். இப்போது, நாம் "ஜெய் அணுசந்தன்" (ஆராய்ச்சி மற்றும் கண்டுபிடிப்பு) சேர்க்க வேண்டும். ஜெய் ஜவான், ஜெய் கிசான், ஜெய் விக்யான் மற்றும்ஜெய் அணுசந்தன்.

ஊழல், உறவுமுறை இரண்டு முக்கிய சவால்கள். ஊழல் செய்பவர்களை தண்டிக்க வேண்டும் என்ற மனநிலை மக்களிடம் இல்லாத வரையில், நாடு சிறந்த வேகத்தில் முன்னேற முடியாது. அதற்கு எதிராக நாம் ஒன்றுபட வேண்டிய மற்றொரு தீமை, சொந்த பந்தம். தேசத்தின் முன்னேற்றத்திற்காக பாடுபடும் திறமைசாலிகளுக்கு வாய்ப்பளிக்க வேண்டும்