திருச்சியில் தந்தையால் ரூ.50 ஆயிரத்திற்கு விற்கப்பட்ட குழந்தை மீட்பு

திருச்சி காந்திபுரம் தேவர் காலனி பகுதியை சேர்ந்தவர் அப்துல்சலாம். இவரது மனைவி கைருன்னிஷா. இவர்களுக்கு ஏற்கனவே 4 குழந்தைகள் உள்ள நிலையில், கடந்த 2 மாதத்திற்கு முன்பு 5-வதாக ஒரு ஆண் குழந்தை பிறந்துள்ளது. கூலி தொழிலாளியான அப்துல்சலாம் சரிவர எந்த வேலைக்கும் செல்லாமல் நண்பர்கள், உறவினர்களிடம் கடனாக பணத்தை பெற்று சூதாடி வந்துள்ளார்.

அந்த வகையில் ஆரோக்கியராஜ் என்பவரிடம் ரூ. 25 ஆயிரம் கடன் வாங்கியுள்ளார். இதனை ஈடுகட்ட ஆரோக்கியராஜ் தன்னுடைய உறவினர் ஒருவருக்கு குழந்தை இல்லாததால் தற்போது புதிதாக பிறந்த குழந்தையை தர வேண்டும் என்றும், கூடுதலாக ரூ.25 ஆயிரம் தருவதாகவும் கூறியுள்ளார். இதையடுத்து அப்துல்சலாம் கைருன்னிஷாவிடம் பேசி சமாதானம் செய்து மனதை மாற்றி கடந்த 2 மாதத்திற்கு முன்பு பிறந்த ஆண் குழந்தையை ஆரோக்கியராஜிடம் கொடுத்து பணத்தையும் பெற்றுள்ளார்.

பின்னர் தற்போது திடீரென கைருன்னிஷா தன்னுடைய குழந்தையை மீண்டும் திருப்பித் தர வேண்டும் என்று அப்துல் சலாமிடம் கேட்க, அதற்கு அவர் மறுப்பு தெரிவித்துள்ளார். இதனால் கைருன்னிஷா உறையூர் போலீசில் புகார் ஒன்றை கொடுத்தார். இந்த புகார் குறித்து போலீசார் வழக்கு பதிவு செய்து பெற்ற மகனை ரூ. 50 ஆயிரத்துக்கு விற்ற தந்தை அப்துல்சலாம், அந்த குழந்தையை வாங்கிய ஆரோக்கியராஜ் மற்றும் அவருடைய உறவினரான பொன்னர் மற்றும் சந்தான மூர்த்தி ஆகியோரை கைது செய்தனர்.