ஆதரவின்றி நின்ற மூதாட்டியை மீட்டு உறவினர்களிடம் ஒப்படைத்த போலீசார்

தூத்துக்குடி மாநகராட்சி பகுதிக்குள்பட்ட பல்வேறு இடங்களில் முதியவர்கள், மனநலன் பாதிக்கப்பட்டவர்கள் ஆங்காங்கே ஆதரவின்றி தனியாக சுற்றி வருகின்றனர். இந்த நிலையில், நேற்று (08.04.2023) இரவு தெர்மல்நகர் காவல் நிலைய எல்லைக்குட்பட்ட முத்துநகர் பகுதியில் வயதான மூதாட்டி ஒருவர் ஆதரவின்றி சுற்றித் திரிவதாக தெர்மல்நகர் காவல் நிலைய தனிப்பிரிவு முதல் நிலைக் காவலர் செல்வின்ராஜாவுக்கு தகவல் கிடைத்தது.

இதைத்தொடர்ந்து, சம்பவ இடத்திற்கு சென்ற அவர் அங்கு இருந்த மூதாட்டியை மீட்டு அவருக்கு உணவு வாங்கிக் கொடுத்தார். பின்னர், அந்த மூதாட்டியிடம் பெயர் மற்றும் முகவரி விசாரித்ததில் அவர் முத்தையாபுரம் காவல் நிலைய எல்லைக்குட்பட்ட ஜே.எஸ் நகரை சேர்ந்த ஆறுமுகம் மனைவி பொன்னம்மாள் (88) என்பதும் அவருக்கு இரண்டு மகன்கள் மற்றும் இரண்டு மகள்கள் இருப்பதும் தெரிய வந்தது.

இதனையடுத்து உடனடியாக தனிப்பிரிவு முதல் நிலைக் காவலர் செல்வின்ராஜா முத்தையாபுரம் தனிப்பிரிவு காவலர் ஜான்சனை தொடர்பு கொண்டு மூதாட்டி குறித்த தகவலை கூறி விசாரணை செய்தாராம். விசாரணையில், மூதாட்டி ஜே.எஸ் நகரில் உள்ள அவரது மகன் சுந்தரவேலு வீட்டில் இருந்து தன்னிச்சையாக வெளியே வந்து முத்துநகர் பகுதிக்கு வந்தது தெரியவந்தது.

இதனையடுத்து உடனடியாக தனிப்பிரிவு முதல் நிலைக் காவலர் செல்வின்ராஜா ஒரு ஆட்டோ மூலம் மூதாட்டி பொன்னம்மாளை பத்திரமாக மீட்டு தனிப்பிரிவு காவலர் ஜான்சனுடன் ஜே.எஸ் நகரில் உள்ள அவரது மகன் சுந்தரவேலு வீட்டிற்கு அழைத்து சென்று அவரிடம் பத்திரமாக ஒப்படைத்தனர்.

ஆதரவின்றி தெருவில் சுற்றித்திரிந்த 88 வயது மூதாட்டியை பத்திரமாக மீட்டு அவரது குடும்பத்தாரிடம் ஒப்படைத்த தனிப்பிரிவு காவலர்கள் செல்வின்ராஜா, மற்றும் ஜான்சன் ஆகிய இருவருக்கும் மாவட்ட காவல் கண்காணிப்பாளர் பாலாஜி சரவணன் பாராட்டு தெரிவித்தார்.