தூத்துக்குடியில் மது விற்ற 17 பேர் கைது- 2907 பாட்டில்கள், ரூ. 6,700 பறிமுதல்

தூத்துக்குடி மாவட்டத்தில் காவல்துறையினர் தீவிர சோதனை மேற்கொண்டதில் தூத்துக்குடியில் தென்பாகம் உதவி ஆய்வாளர் வேல்ராஜ் தலைமையில் தலைமைக் காவலர்கள் பென்சிங், மாணிக்கம், சாமுவேல், செந்தில்குமார், மகாலிங்கம், முத்துப்பாண்டி மற்றும் திருமணிராஜன் ஆகியோர் அடங்கிய தனிப்படையினர் தென்பாகம் காவல் நிலையத்திற்குட்பட்ட அண்ணாநகரில் சட்டவிரோதமாக விற்பனை செய்வதற்காக பதுக்கி வைத்திருந்த அண்ணாநகரைச் சேர்ந்த பேச்சிமுத்து மகன் கிருஷ்ணன் என்ற கண்ணன் (23) என்பவரைக் கைது செய்து அவரிடமிருந்து 1872 மதுபாட்டில்களையும் பறிமுதல் செய்தனர்.

அதே போன்று கோவில்பட்டி கிழக்கு காவல் நிலைய எல்லைக்குட்பட்ட பகுதிகளில் உதவி ஆய்வாளர் முருகன் மற்றும் மாதவராஜ் ஆகியோர் தலைமையிலான தனிப்படையினர் ரோந்து சென்று வரும்போது சட்ட விரோதமாக விற்பனை செய்வதற்காக வைத்திருந்த 5 பேரைக் கைது செய்து அவர்களிடமிருந்த 885 மதுபாட்டில்களையும் பறிமுதல் செய்தனர்.

மேலும் தூத்துக்குடி வடபாகம், தெர்மல்நகர், ஸ்ரீவைகுண்டம், கோவில்பட்டி மேற்கு, எட்டயாபுரம், தட்டார்மடம், தூத்துக்குடி மதுவிலக்கு பிரிவு மற்றும் கோவில்பட்டி மதுவிலக்கு பிரிவு ஆகிய காவல் நிலையங்களுக்கு எல்லைக்குட்பட்ட பகுதிகளில் சோதனை மேற்கொண்டதில் 11 பேரைக் கைது செய்து, அவர்களிடமிருந்து 150 மதுபாட்டில்களையும் பறிமுதல் செய்தனர்.