கோவில்பட்டியில் அகில இந்திய ஹாக்கி போட்டி: நியூ டெல்லி அணி சாம்பியன்

தூத்துக்குடி மாவட்டம், கோவில்பட்டி கிருஷ்ணா நகரில் உள்ள செயற்கை புல்வெளி ஹாக்கி மைதானத்தில் கே.ஆர். மருத்துவம் மற்றும் கல்வி அறக்கட்டளையின் சார்பில், கே.ஆர்.கல்வி நிறுவனங்கள், இலட்சுமி அம்மாள் ஸ்போர்ட்ஸ் அகாடமியுடன் இணைந்து நடத்தும் இலட்சுமி அம்மாள் நினைவுக் கோப்பைக்கான பன்னிரெண்டாவது அகில இந்திய ஹாக்கிப் போட்டிகள் கடந்த 18 ஆம் தேதி முதல் நடைபெற்றது.

இதில் இந்தியா முழுவதிலும் இருந்து புகழ்பெற்ற 16 அணிகள் கலந்து கொண்டன. நான்கு பிரிவுகளாக பிரிக்கப்பட்டு லீக் போட்டிகளும், காலியிறுதி, அரையிறுதி போட்டிகள் நடைபெற்றது. இறுதி போட்டிக்கு நியூ டெல்லி பெட்ரோலியம் ஸ்போர்ட்ஸ் ப்ரோமோஷன் போர்டு அணியும், செகந்திராபாத், சவுத் சென்ட்ரல் ரயில்வே அணியும் தகுதி பெற்றன.

இறுதி போட்டியை கே.ஆர்.குழுமங்கள் மற்றும் கல்வி நிறுவனங்களின் துணைத் தலைவர் கிருஷ்ணமூர்த்தி மற்றும் தாளாளர் அருணாச்சலம் தலைமையில், இந்திய தேசிய பீல்ட் ஹாக்கி அணியின் முன்னாள் கேப்டனும் அர்ஜுனா விருது பெற்றவருமான முகமது ரியாஸ் மற்றும் முன்னாள் பாராளுமன்ற உறுப்பினர் அழகிரிசாமி, ஆகியோர் சிறப்பு விருந்தினராக கலந்து கொண்டு துவங்கி வைத்தனர்.

நியூ டெல்லி பெட்ரோலியம் ஸ்போர்ட்ஸ் ப்ரோமோஷன் போர்டு அணியும், செகந்திரபாத், சவுத் சென்ட்ரல் ரயில்வே அணியும் மோதிய இறுதிப் போட்டியில் 3-1 என்ற கோல் கணக்கில் நியூ டெல்லி பெட்ரோலியம் ஸ்போர்ட்ஸ் ப்ரோமோஷன் போர்டு அணி வெற்றி பெற்று சாம்பியன் பட்டத்தை தட்டிச்சென்றது.

செகந்திராபாத் சவுத் சென்ட்ரல் ரயில்வே அணி இரண்டாவது இடத்தையும், நியூடெல்லி பஞ்சாப் நேஷனல் வங்கி அணி மூன்றாவது இடத்தையும், நியூடெல்லி காம்ப்ட்ரோலர் மற்றும் ஆடிட்டர் ஜெனரல் ஆப் இந்திய அணி நான்காவது இடத்தையும் பிடித்தன.

முதலிடம் பெற்ற நியூ டெல்லி, பெட்ரோலியம் ஸ்போர்ட்ஸ் ப்ரோமோஷன் போர்டு அணிக்கு இலட்சுமி அம்மாள் அகில இந்திய நினைவு ஹாக்கி கோப்பை மற்றும் ஒருலட்சம் ரூபாய் ரொக்கப் பரிசு வழங்கப்பட்டது. இரண்டாமிடம் பெற்ற செகந்திரபாத், சவுத் சென்ட்ரல் ரயில்வே அணிக்கு 75,000 ரூபாய் ரொக்கப் பரிசும், மூன்றாமிடம் பெற்ற நியூ டெல்லி, பஞ்சாப் நேஷனல் பேங்க் அணிக்கு 50,000 ரூபாய் ரொக்கப் பரிசும், நான்காமிடம் பெற்ற நியூ டெல்லி, காம்ப்ட்ரோலர் மற்றும் ஆடிட்டர் ஜெனரல் ஆப் இந்தியா அணிக்கு 30,000 ரூபாய் ரொக்கப் பரிசு மற்றும் நினைவு கோப்பைகளும் வழங்கபட்டன.

மேலும், காலுறுதிப் போட்டியில் விளையாடிய கோவில்பட்டி - ஸ்போர்ட்ஸ் ஹாஸ்டல் ஆப் எக்ஸலன்ஸ் எஸ்டிஏடி அணி, சென்னை - இந்தியன் ஓவர்சீஸ் பேங்க் அணி, பெங்களூரு - கனரா பேங்க் அணி, சென்னை - ஜிஎஸ்டி & சென்ட்ரல் எக்ஸைஸ் அணி ஆகிய அணிகளுக்கு ஆறுதல் ரொக்கப் பரிசாக தலா 20,000 ரூபாய் வழங்கப்பட்டது.