வெண்ணந்தூர் பேரூராட்சிப் பகுதியில் நலத்திட்டப் பணிகள் : ஆட்சியர் ஆய்வு

namakkal news, namakkal news today- வெண்ணந்தூர் ஊராட்சி ஒன்றியம், செம்மாண்டப்பட்டி ஊராட்சியில் ஒன்றிய பொது நிதியின் கீழ் ரூ.23 லட்சம் மதிப்பீட்டில் செம்மாண்டப்பட்டி முதல் நடுப்பட்டி வரை ஏரிக்கரை மீது தார்சாலை அமைக்கும் பணியினை ஆட்சியர் பார்வையிட்டார். அப்போது, நிர்ணயிக்கப்பட்ட ஒப்பந்த காலத்திற்குள் தரமான முறையில் சாலையினை அமைக்க வேண்டும் என அலுவலர்களுக்கு அறிவுறுத்தினார்.

மேலும் நடுப்பட்டி ஊராட்சி, செம்மாண்டப்பட்டியில் மேற்கொள்ளப்பட்டு வரும் வளர்ச்சி திட்ட பணிகளின் தற்போதைய நிலை, பணி முன்னேற்றம் ஆகியவை குறித்து அதிகாரிகளிடம் கேட்டறிந்தார். பின்னர் செம்மாண்டப்பட்டி ஊராட்சி ஒன்றிய தொடக்கப்பள்ளியில் மாணவ, மாணவியர்களின் வருகை குறித்து கேட்டறிந்தார். மேலும் தொடக்கப்பள்ளியில் குடிநீர் வசதி, வகுப்பறை கட்டிடங்கள் வசதி மற்றும் கழிப்பறை வசதிகள் உள்ளிட்ட அடிப்படை வசதிகள் குறித்து நேரில் பார்வையிட்டு ஆய்வு மேற்கொண்டார்.

இதனைத் தொடர்ந்து, செம்மாண்டப்பட்டி குழந்தைகள் மையத்தில், வருகை தரும் குழந்தைகள் எண்ணிக்கை, குழந்தைகள் வளர்ச்சி வகிதம், குழந்தைகளுக்கு வழங்கப்படும் சத்துணவு உள்ளிட்ட பல்வேறு விவரங்களை விரிவாக ஆய்வு செய்தார். மேலும், வெண்ணந்தூர் பேரூராட்சியில் நகர்ப்புற மேம்பாட்டு திட்டத்தின் கீழ் ரூ.1 கோடியே 50 லட்சம் மதிப்பீட்டில், பேரூராட்சி மயானத்தில், நவீன எரிவாயு தகன மேடை அமைக்கும் பணியினை கலெக்டர் பார்வையிட்டு ஆய்வு செய்தார்.

பின்னர், வெண்ணந்தூர் பேரூராட்சியில் கடைவீதி மற்றும் சந்தையில் தடை செய்யப்பட்ட பிளாஸ்டிக் பைகள் பயன்படுத்தப்படுகிறதா என்பது குறித்து மாவட்ட ஆட்சியர் திடீர் ஆய்வு மேற்கொண்டார். நிகழ்ச்சியில், வெண்ணந்தூர் ஊராட்சி ஒன்றியத் தலைவர் தங்கம்மாள், வெண்ணந்தூர் பேரூராட்சி தலைவர் ராஜேஷ், வட்டார வளர்ச்சி அலுவலர்கள் பிரபாகரன், வனிதா, பேரூராட்சி செயல் அலுவலர் யசோதா உள்ளிட்டோர் கலந்துகொண்டனர்.