வருவாய் துறையில் லஞ்சம் அதிகரித்துள்ளது: எம்.எல்.ஏ. பகீர் குற்றச்சாட்டு

நாமக்கல் கலெக்டர் அலுவலகத்தில், விவசாயிகள் குறைதீர்க்கும் நாள் கூட்டம் நடந்தது. கூட்டத்திற்கு மாவட்ட ஆட்சியர் ஸ்ரேயா சிங் தலைமை வகித்தார்.

கூட்டத்தில் கொமதேக. ஈஸ்வரன் (திருச்செங்கோடு எம்.எல்.ஏ.) பேசுகையில், நான்கு மாதமாக விவசாயிகள் குறைதீர்க்கும் நாள் கூட்டத்தில் கலந்து கொள்கிறேன். இந்த கூட்டம் குறித்து தகவல் அரசுக்கு அனுப்பி வைக்கப்படுகிறது. அதில், நான் கூட்டத்தில் கலந்து கொண்டதாக மட்டுமே குறிப்பிடப்பட்டுள்ளது. என்ன பேசினேன் என எதுவும் பதிவாகவில்லை. நாமக்கல் மாவட்டத்தில், வருவாய் துறையில் லஞ்சம் அதிகரித்துள்ளது. ஆன் லைன் மூலம் சான்றிதழ் வழங்கும் முறையிலும், எந்த விதமான லஞ்சமும் குறையவில்லை. வருவாய்த் துறையில் இருக்கும் அளவுக்கு லஞ்சம் வேறு எந்த துறையிலும் இருப்பதாக தெரியவில்லை. அதனால், சாமானிய மக்கள் பெரிதும் பாதிக்கப்பட்டுள்ளனர். அதற்கு ஆட்சியர் முடிவு கட்ட வேண்டும். அவற்றை கட்டுப்படுத்த, மாதம் தோறும் ஆய்வு கூட்டம் நடத்தி கட்டுப்படுத்த வேண்டும்.

பாலசுப்ரமணியன் (பொதுச்செயலாளர், விவசாய முன்னேற்ற கழகம்) பேசுகையில் ஒருங்கிணைந்த வேளாண் வளர்ச்சித் திட்டத்தில், தேர்வு செய்யப்பட்ட கிராமங்களுக்கு, தென்னை சாகுபடி செய்யும் சாகுபடி செய்யும் விவசாயிக்கு இனகவர்ச்சி பெட்டி வழங்குகின்றனர். ஒரு பெட்டி, வெளி மார்க்கெட்டில் ரூ. 200, மருந்து ரூ. 400 என, மொத்தம், 600 ரூபாய். ஆனால், வேளாண் துறையில், இரண்டு மருந்து ரூ. 1,200, பெட்டி ரூ. 200, மொத்தம் ரூ. 1,400. மானியம், ரூ. 700 போக, விவசாயிகளிடம் ரூ. 700 வசூல் செய்கின்றனர். மொத்த அடக்கவிலை ரூ. 500க்குள் வரும் நிலையில், இந்த விசயத்தில் பெரிய அளவில் மோசடி நடக்கிறது. இது குறித்து ஆட்சியர் நடவடிக்கை எடுக்க வேண்டும் என கூறினார்

விவசாயி நடேசன் என்பவர் கூறுகையில், பிரதமர் கிசான் சம்மான் நிதி திட்டத்தில், விவசாயிகளுக்கு உதவித் தொகை ஒரு ஆண்டுக்கு ரூ. 8,000 ஆக உயர்த்தி உள்ளனர். தகுதி உள்ள விவசாயிகளுக்கு, 12வது தவணையை நிறுத்திவிட்டனர். ஒரு சில விவசாயிகளுக்கு மட்டுமே உயர்த்தி வழங்கப்பட்டதாக தெரிவிக்கின்றனர். ஆனால், தகுதி உள்ள அனைத்து விவசாயிகளுக்கும் கிடைக்கவில்லை என கூறினார்

சரவணன் (விவசாயி) பேசுகையில், : நாமகிரிப்பேட்டை ஒன்றியம், அரியாகவுண்டம்பட்டி–குருவாலா சாலை பகுதியில், தனியார் ஆக்கிரமிப்பு உள்ளது. இதனால் போக்குவரத்துக்கு இடையூறாக உள்ளது. ஆக்கிரமிப்பை அகற்றி, போக்குவரத்தை சீர் செய்ய வேண்டும் என்று கூறினார்.