தமிழகத்தில் பழைய ஓய்வூதிய திட்டம்: முதல்வருக்கு ஆசிரியர்கள் கோரிக்கை

தமிழக அரசு ஊழியர்கள் மற்றும் ஆசிரியர்களுக்க பழைய ஓய்வூதிய திட்டத்தை அறிவிக்க வேண்டும் என்று தமிழக முதல்வருக்கு ஆசிரியர் சங்கம் வேண்டுகோள் விடுத்துள்ளது.

இது குறித்து, நேரடி நியமனம் பெற்ற முதுகலைப்பட்டதாரி ஆசிரியர்கள் சங்க மாநிலத்தலைவர், நாமக்கல் ராமு, தமிழக முதல்வருக்கு அனுப்பியுள்ள கோரிக்கை மனுவில் கூறியுள்ளதாவது:

தமிழகத்தில், 1.4.2003க்குப் பிறகு பணியில் சேர்ந்த அரசு ஊழியர்கள் மற்றும் ஆசிரியர்களுக்கு பழைய ஓய்வுதியத் திட்டத்தை அறிவிக்க எடுக்க வேண்டும். ராஜஸ்தான் மாநில அரசு, பட்ஜெட் உரையில் 1-4-2003 க்கு பிறகு பணியில் சேர்ந்தவர்களுக்கு அடுத்த ஆண்டு முதல் பழைய ஓய்வூதியம் வழங்கப்படும் என அறிவித்துள்ளது. இதைப்போன்று தமிழகத்திலும் அறிவிக்கமுதல்வர் நடவடிக்கை எடுக்க வேண்டும்.

கடந்த ஆட்சியில் பங்களிப்பு ஓய்வூதியத் திட்டத்தை ரத்து செய்து விட்டு பழைய ஓய்வூதியத் திட்டத்தை அமல்படுத்த வேண்டும் என்று தமிழகம் முழுவதும் பல்வேறு போராட்டங்கள் நடைபெற்றது. அப்போது போராட்ட களத்திற்கு நேரில் வந்து நாங்கள் ஆட்சிக்கு வந்தால் புதிய ஓய்வூதியத் திட்டத்தை ரத்து செய்துவிட்டு பழைய ஓய்வூதிய திட்டத்தை உடனடியாக அமல்படுத்துவோம் என்று தற்போதைய தமிழக முதல்வர் அறிவித்தார். மேலும், திமுகதேர்தல் அறிக்கையிலும் தமிழ்நாடு அரசு பணியாளர்கள் மற்றும் ஆசிரியர்களுக்கு திமுக ஆட்சி அமைந்ததும் புதிய ஓய்வூதியத் திட்டத்தை ரத்து செய்துவிட்டு பழைய ஓய்வூதிய திட்டத்தை அமல்படுத்துவோம் என்று உறுதிமொழி வழங்கப்பட்டுள்ளது.

எனவே தமிழக அரசில் பணிபுரியும் லட்சக்கணக்கான அரசு பணியாளர்கள் மற்றும் ஆசிரியர்கள் தங்களது முக்கியமான வாழ்வாதார கோரிக்கையான பழைய ஓய்வூதிய திட்டத்தை நடைமுறைப்படுத்த தமிழக அரசு உடனடியாக அறிவிக்க வேண்டும் என்று அந்த மனுவில் கூறப்பட்டுள்ளது.