மேட்டூர் அணையிலிருந்து 5 ஆயிரம் கன அடி நீர் திறக்க விவசாயிகள் சங்கம் கோரிக்கை

விவசாயிகளின் நலன் கருதி மேட்டூர் அணையில் இருந்து 5,000 கன அடி தண்ணீர் திறக்க வேண்டும் என்று விவசாயிகள் வேண்டுகோள் விடுத்துள்ளனர்.

இது குறித்து தமிழ்நாடு விவசாயிகள் முன்னேற்றக் கழக நிறுவன தலைவர் செல்ல ராஜாமணி, பொதுச்செயலாளர் பாலசுப்ரமணியம் ஆகியோர் தமிழக முதல்வருக்கு அனுப்பியுள்ள கோரிக்கை மனுவில் கூறியுள்ளதாவது:

தற்போது மேட்டூர் நீர் அணையில், 108 அடி (75டிஎம்சி) நீர் இருப்பு உள்ளது. அணையில்இருந்து, குடிநீருக்காக 1,500 கன அடி நீர் திறக்கப்பட்டுள்ளது. இந்த நீர் குடிநீருக்காகவும், காவிரி கரையோரம் ஆற்று நீர் பாசனம் செய்யவும் பயன்படுத்தப்படுகிறது. மேலும் காவிரி ஆற்றில் தண்ணீர் குறைந்ததால், காவிரி கரையின் இருபுறமும் உள்ள ஊற்று நீர் கிணறுகளில்ங நீர் மட்டம் குறைந்துள்ளது.

இதனால் கிணற்று நீர் பாசனம் செய்யும் விவசாய நிலங்களில் தண்ணீர் பற்றாக்குறை ஏற்பட்டு விவசாய பயிர்கள் காயும் நிலை ஏற்பட்டுள்ளது. எனவே பொதுமக்கள் மற்றும் விவசாயிகளின் நலன் கருதி, மேட்டூர் அணையில் இருந்து உடனடியாக குறைந்தது 5,000 கனஅடி நீர் திறப்பதற்கு தமிழக முதல்வர் நடவடிக்கை எடுக்க வேண்டும்.

குறிப்பாக சேலம், நாமக்கல், ஈரோடு, கரூர், திருச்சி,புதுக்கோட்டை, தஞ்சாவூர், நாகப்பட்டினம் உள்ளிட்ட பல்வேறு மாவட்டங்கள் குடிநீருக்கும், பாசனத்திற்கும் காவிரியை நம்பியே உள்ளதால், இதில் சிறப்பு கவனம் செலுத்த வேண்டும். சில இடங்களில் விவசாயிகள், காவிரியிலிருந்து விவசாய நிலங்களுக்கு தண்ணீர் பாசனம் செய்யும்போது, சிலர் பணம் பறிக்கும் முயற்சியில் ஈடுபட்டு வருகின்றனர். இதனால் தமிழக அரசிற்கு கெட்ட பெயர் ஏற்படுகிறது.

எனவே இதுபோன்ற சம்பவங்கள் நடைபெறாமல் இருப்பதற்கு, காவிரி பாயும் பகுதிகளில் சிறப்பு கண்காணிப்பு அதிகாரிகளை நியமிக்க வேண்டும் என வேண்டுகோள் விடுத்துள்ளனர்.