கரூர் மாவட்டத்தில் 1214 மாணவ மாணவியர்களுக்கு விலை இல்லா மிதிவண்டி

கரூர் மாவட்டத்தில் அரசு மேல்நிலை பள்ளிகளில் 11 ம் வகுப்பு பயிலும் மாணவ மாணவிகளுக்கு இலவச மிதிவண்டி வழங்கும் திட்டத்தின் கீழ் முதல் கட்டமாக 14 பள்ளிகளில் 1214 மாணவ மாணவியர்களுக்கு விலை இல்லா மிதிவண்டி வழங்கும் திட்டத்தை வாங்கல் அரசு ஆண்கள் மேல்நிலைப் பள்ளியில் நடைபெற்ற நிகழ்ச்சியில் மாவட்ட கலெக்டர் தங்கவேல் தொடங்கிவைத்தார்.

இந்நிகழ்ச்சியில் கலெக்டர் கூறுகையில், பன்னிரெண்டாம் வகுப்பு முடிக்கும் முன் படிப்பை தொடர முடியாமல் இருக்கும் மாணவர்கள் மீது கவனம் செலுத்தி அவர்களை மீண்டும் பள்ளியில் சேர்ந்து கல்வி கற்க வைப்பதற்காக தமிழ்நாடு அரசு பல்வேறு திட்டங்களை சிறப்பாக செயல்படுத்தி வருகிறது.

நீங்களும் உங்களுக்கு தெரிந்தவர்களிடம் பள்ளிக்கு செல்லாமல் உள்ளவர்கள், இடை நின்றவர்கள் மற்றும் பொருளாதார ரீதியாக பள்ளிக்கு அனுப்பாத பெற்றோர்களை கண்டறிந்தாலோ அல்லது பள்ளிக்குச் செல்லாமல் குழந்தைத் தொழிவாளர்களாக வேலைக்கு செல்பவர்களை கண்டறிந்தாலோ சொல்லுங்கள். அரசாங்கம் பாட புத்தகம், புத்தகப்பை கல்வி உதவித்தொகை என பல்வேறு நலத்திட்டங்களை வழங்கி வருகிறது.

கரூர் மாவட்டத்தை பொறுத்தவரை 56 அரசு மேல்நிலைப் பள்ளிகளுக்கு 6144 மிதிவண்டிகள் ஒதுக்கீடு செய்யப்பட்டுள்ளது. அந்த வகையில் வாங்கல் ஆண்கள் மேல்நிலைப்பள்ளியில் 44 மாணவர்களுக்கும் பெண்கள் மேல்நிலைப் பள்ளியில் 58 மாணவியர்களுக்கும் என மொத்தம் 102 மிதிவண்டிகள் வழங்கப்பட உள்ளன. கரூர் மாவட்டத்தில் இன்று மட்டும் 14 பள்ளிகளில் பயிலும் 1214 மாணவ மாணவியருக்கு முதல் கட்டமாக வழங்கப்பட உள்ளதால் அதன் தொடக்கமாக இந்நிகழ்ச்சி நடைபெறுகிறது என்றார்.

மாவட்ட முதன்மை கல்வி அலுவலர் சுமதி, மண்மங்கலம் வட்டாட்சியர் குமரேசன், வாங்கல் குப்பிச்சிபாளையம் ஊராட்சி மன்ற தலைவர் வசந்தி, துணைத் தலைவர் ஜெயந்தி, தலைமையாசிரியர்கள் பாலகிருஷ்ணன், தசண்முகவடிவு மற்றும் பலர் கலந்துகொண்டனர்.