ஈரோட்டில் ஊரக உள்ளாட்சி தேர்தலுக்கான அட்டவணையை தேர்தல் ஆணையம் வெளியீடு

ஊரக உள்ளாட்சி தேர்தலில் தமிழகத்தில் விடுபட்ட மாவட்டங்களான காஞ்சிபுரம், செங்கல்பட்டு, வேலூர், ராணிப்பேட்டை, திருப்பத்தூர், விழுப்புரம், கள்ளக்குறிச்சி, நெல்லை, தென்காசி ஆகிய 9 மாவட்டங்களிலும் 2 கட்டங்களாக, ஊரக உள்ளாட்சித் தேர்தல் நடைபெறும் என தேர்தல் ஆணையம் அறிவித்துள்ளது. அதேபோல் ஊரக உள்ளாட்சி அமைப்புகளில் கடந்த 2019-ஆம் ஆண்டு நிரப்பப்பட்ட பதவியிடங்களில் இறப்பு, பதவி விலகல் போன்ற காரணங்களால் காலியாக உள்ள பதவிகளுக்கு தற்செயல் தேர்தல் நடத்தவும் முடிவு செய்யப்பட்டுள்ளது. அதன்படி ஈரோடு மாவட்டத்தில் கடந்த ஜுன்-30 தேதி வரை ஏற்பட்டுள்ள 27 காலிப்பணியிடங்களை நிரப்புவதற்காக, தற்செயல் தேர்தல்கள் நடத்தப்படும் என தமிழ்நாடு தேர்தல் ஆணையம் அறிவித்துள்ளது. அதன்படி அம்மாபேட்டை ஊராட்சி ஒன்றியத்தில் மாவட்ட ஊராட்சி வார்டு எண்.5 -க்கான தேர்தலும், ஈரோடு ஊராட்சி ஒன்றியத்தில் ஊராட்சி ஒன்றிய வார்டு உறுப்பினர் 4-க்கான தேர்தலும், பெருந்துறை ஊராட்சி ஒன்றியத்தில் ஊராட்சி ஒன்றிய வார்டு உறுப்பினர் 10-க்கான தேர்தலும் மற்றும் காலிப்பணியிடங்கள் ஏற்பட்டுள்ள 4.சிற்றூராட்சித் தலைவர்களுக்கும் மற்றும் 20-கிராம ஊராட்சி வார்டு உறுப்பினர்களுக்கும் தற்செயல் தேர்தல்கள் நடைபெறவுள்ளது. மேலும் ஊரக உள்ளாட்சி தேர்தல்கள் நடத்துவதற்கான கால அட்டவணை தமிழ்நாடு மாநில தேர்தல் ஆணையம் வெளியிட்டுள்ளது.

1.தேர்தல் அறிவிப்பு பிரசுரித்தல் மற்றும் வேட்புமனுக்கள் பெறுதல் - 15-09-21 தேதியன்று காலை 10 மணி முதல் மாலை 5 மணி வரை.

2.வேட்புமனு தாக்கல் செய்வதற்கான இறுதி நாள் - 22-09-21 தேதியன்று காலை 10 மணி முதல் மாலை 5 மணி வரை

3.வேட்புமனுக்களை ஆய்வு செய்தல் - 23-09-21 தேதியன்று காலை 10 மணி

4.வேட்புமனுக்களை திரும்பப் பெறுதல் - 25-09-21 தேதியன்று காலை 10 மணி முதல் மாலை 3 மணி வரை

5.வாக்குப்பதிவு நாள் - 09-10-21 தேதியன்று காலை 7 மணி முதல் மாலை 6 மணி வரை

6.வாக்கு எண்ணிக்கை நடைபெறும் நாள் - 12-09-21 தேதியன்று காலை 8 மணிக்கு

7.தேர்தல் நடவடிக்கைகள் முடிவு பெறும் நாள் - 16-10-21 தேதி

8.தேர்ந்தெடுக்கப்பட்ட வார்டு உறுப்பினர்கள் மற்றும் கிராம ஊராட்சித் தலைவர்களின் முதல் கூட்டம் பதவியேற்பு நாள் - 20-10-21 தேதி