எட்டு ஆண்டுகளுக்கு பின் நிரம்பிய திருவொற்றியூர் ஆதிஷேச தீர்த்த குளம்

கனமழை காரணமாக, எட்டுஆண்டுகளுக்கு பின், திருவொற்றியூர், தியாகராஜ சுவாமி கோவில் உள்ளே பிரம்ம தீர்த்த குளம் - வெளியே, ஆதிஷேச தீர்த்த குளமும் நிரம்பி ரம்மியமாக காட்சியளிக்கிறது.

மிக்ஜம் புயல் காரணமாக, வடதமிழக மாவட்டங்களில் கனமழை வெளுத்து வாங்கியது. சென்னை முழுவதும் வெள்ளக்காடாக மாறியது. இந்நிலையில், 2015 ம் ஆண்டிற்கு பின், திருவொற்றியூர், தியாகராஜ சுவாமி கோவில் குளங்கள் நிரம்பியுள்ளது.

தியாகராஜ சுவாமி கோவில் வெளியே இருக்கும், 2.5 ஏக்கர் பரப்பளவிலான ஆதிஷேச தீர்த்த குளம், 2 லட்சம் லிட்டர் தண்ணீர் கொள்ளளவு கொண்டது.

தற்போது பெய்த கனமழையால், மழைநீர் வடிகால் வழியாக குளத்திற்கு வந்த மழைநீரால், 12 படிகட்டு அளவிற்கு தண்ணீர் தேங்கி ரம்மியமாக காட்சியளிக்கிறது. இது மொத்தம் 1.2 லட்சம் லிட்டர் தண்ணீர் ஆகும்.

இந்த மழை காரணமாக குளத்தில் நிரம்பிய தண்ணீரில், தைப்பூசத்திற்கு தெப்போற்சவம் நடத்த முடியும் என கோவில் நிர்வாகம் நம்பிக்கை தெரிவித்தது.

இதற்கு முன்பு , 2015 ம் ஆண்டிற்கு பின் எட்டு ஆண்டுகளுக்கு பின் குளத்தில் இவ்வளவு தண்ணீர் தேங்குவது குறிப்பிடத்தக்கது.

அதே போல், கோவில் உட்புறத்தில் உள்ள, பிரம்ம தீர்த்த குளமும், நிரம்பி ததும்புகிறது. இதனால், பக்தர்கள் மகிழ்ச்சியில் ஆழ்ந்துள்ளனர்