+2 தேர்வு: அனைத்து கட்சி எம்எல்ஏக்களிடம் நாளை கருத்து கேட்பு-அமைச்சர்

சென்னை தலைமைச்செயலகத்தில் மாவட்ட முதன்மை கல்வி அலுவலர்கள் மற்றும் பள்ளி கல்வித்துறை அதிகாரிகள் கல்வியாளர்கள் ஆகியோருடன் பிளஸ் டூ தேர்வு நடத்துவது குறித்து பள்ளி கல்வித்துறை அமைச்சர் அன்பில் மகேஷ் கலந்தாலலோசனை நடத்தினார்.

இந்த கூட்டத்திற்கு பின் செய்தியாளர்களுக்கு பேட்டியளித்த அவர், பிளஸ் டூ தேர்வு நடத்துவது தொடர்பாக அமைச்சர் என்ற முறையில் நாளை மதியம் 12 மணிக்கு காணொளி காட்சி வாயிலாக அனைத்து சட்டமன்ற கட்சி பிரதிநிதிகளிடம் கருத்து கேட்பது என முடிவு செய்யப்பட்டுள்ளது. மருத்துவ நிபுணர்களுடனும், மன நல நிபுணர்கள் உடனும் நாளை கலந்தாலோசிக்க உள்ளேன்.

பல்வேறு மாநிலங்களில் பிளஸ் 2 பொதுத்தேர்வுகளை ரத்து செய்துள்ளன. மத்திய அரசு சிபிஎஸ்சி பிளஸ் 2 தேர்வு முறைகளை ரத்து செய்துள்ளது. எனவே மதிப்பெண் கணக்கிடும் முறை உள்ளிட்டவை குறித்து தீவிரமாக கண்காணித்து வருகிறோம்.

திடீரென தேர்வு என்று அறிவித்தால் மாணவர்களுக்கு அச்சத்தை ஏற்படுத்தும். எனவே தேர்வு அறிவிக்கப்பட்டால் உரிய கால அவகாசம் வழங்கப்படும். மாணவர்களுக்கு எந்தவித பாதகமுமின்றி முடிவு எடுக்கப்படும். ஆன்லைன் வகுப்புகளுக்கான வழிகாட்டு நெறிமுறைகள் தயாராக உள்ளது.7ம் தேதி முதல்வரின் ஒப்புதலுக்கு பிறகு நெறிமுறைகள் வெளியிடப்படும் என்றார்.