செய்வினை எடுப்பதாக கூறி ரூ.12 லட்சம் மோசடி: 3 பேர் கைது

அரியலூர் மாவட்டத்தைச் சேர்ந்த விஜயகுமார் என்பவர் தனக்கு செய்வினை வைக்கப்பட்டுள்ளது என மொபைலுக்கு வந்த அழைப்பை நம்பி 12 லட்சத்தை இழந்து விட்டதாக அரியலூர் சைபர் கிரைம் காவல் நிலையத்தில் புகார் அளித்தார். இந்த புகாரின் பேரில் அரியலூர் சைபர் கிரைம் காவல் நிலைய காவல் ஆய்வாளர் செங்குட்டுவன் வழக்கு பதிவு செய்து விசாரனை நடத்தினார்.

இவ்வழக்கில் விசாரணை செய்த சைபர் கிரைம் காவல்துறையினர் திருவள்ளூர் மாவட்டம், செங்குன்றத்தை சேர்ந்த வல்லவராஜ் (25), கிருஷ்ணன் @ தர்மராஜ் (24), செங்குன்றம், சேலம் மாவட்டம் சீலநாயக்கன்பட்டி, பேய் தலையன் @ சனியன் என்கின்ற குமார் (39) ஆகியோரை கைது செய்தனர். இவர்களிடம் போலிசார் மேற்கொண்ட விசாரனையில், சேலம் மாவட்டம் எருமபாளையம் பேருந்து நிலையத்தில் வரும் பொதுமக்களிடம் கைரேகை பார்ப்பதாக கூறி கைரேகை பார்த்தவுடன் உங்களுக்கு தோஷம், செய்வினை உள்ளதாகவும் கூறி அவர்களின் மொபைல் நம்பரை பெற்று கொள்கின்றனர். பின்னர் மூன்று நபர்களும் சம்மந்தப்பட்ட நபர்களை தொடர்ந்து செல்போனில் தொடர்பு கொண்டு நீங்கள் பரிகாரம் செய்யவில்லை என்றால் உங்கள் வீட்டில் அசம்பாவிதங்கள் நடைபெறும் எனக்கூறி அச்சுறுத்தி உள்ளனர்.

இதுபோன்று அரியலூர் மாவட்டத்தை சேர்ந்த விஜயகுமாருக்கு பில்லி சூனியம் இருப்பதாக கூறி கொல்லிமலைக்கு சென்று பரிகாரம் செய்ய வேண்டும் எனவும் அதற்கான தொகையை தனது வங்கி கணக்கில் அனுப்புமாறும் கூறியள்ளனர். இதனைத்தொடர்ந்து வங்கியின் மூலமாகவும் நேரடியாகவும் இதுவரை 12 லட்சம் ரூபாய் வரை விஜயகுமாரிடம் மோசடி செய்தது போலிசாரின் விசாரனையில் தெரியவந்தது. இதனையடுத்து மூவரையும் கைது செய்த சைபர் க்ரைம் காவல்துறையினர் மூவரிடம் இருந்தும் 6,30,000/- ரூபாய் மதிப்புள்ள வீட்டு உபயோக பொருட்கள், கார், இருசக்கர வாகனங்கள் மற்றும் நகையை பறிமுதல் செய்து. குற்றவாளிகள் மூவரையும் நீதிமன்ற காவலுக்கு அனுப்பி வைத்துள்ளனர்.