கொள்ளிடம் ஆற்றில் அடித்துச் செல்லப்பட்ட மூதாட்டி உயிருடன் மீட்பு

திருமானூர் அடுத்த குந்தபுரம் கிராமத்தை சேர்ந்தவர் பழனிவேல் மனைவி மூக்காயி(72). இவர் நேற்று காரைப்பாக்கம் பகுதி கொள்ளிடம் ஆற்றுக்கு குளிக்கச் சென்றபோது, தண்ணீரில் இழுத்து செல்லப்பட்டார். அப்போது, அவர் கையை மேலே தூக்கியபடி சத்தம் போட்டுள்ளார். 2 கி.மீட்டர் தூரம் ஆற்றில் இழுத்துச்செல்லப்பட்ட நிலையில், திருமானூர் பகுதியில் ஆடுமேய்த்துக்கொண்டிருந்த கிருஷ்ணமூர்த்தி என்பவர் பார்த்து சத்தம் போட்டுள்ளார். அப்போது, திருமானூர் கொள்ளிடம் பாலத்தில் உள்ள சோதனை சாவடியில் பணியிலிருந்த கவிதா என்ற பெண் காவலர் இதுகுறித்து, திருமானூர் காவல் துறைக்கு தகவல் கொடுத்தார்.

விரைந்து வந்த காவல்ஆய்வாளர் கோபிநாத் தலைமையிலான போலீஸார் மற்றும் தகவலறிந்து வந்த அரியலூர் தீயணைப்புத் துறை நிலைய அலுவலர் ஜெயக்குமார் தலைமையிலான வீரர்கள் திருமானூர் பாலத்திலிருந்து மேலும் 1 கி.மீட்டர் தூரத்திக்கு இழுத்துச் செல்லப்பட்ட மூதாட்டியை திருமானூர் சுடுகாடு பகுதியில் பத்திரமாக உயிருடன் மீட்டனர்.

கொள்ளிடம் ஆற்றில் மூதாட்டி 3 கி.மீட்டர் தூரம் தண்ணீரில் இழுத்துச் செல்லப்பட்ட நிலையில், உயிருடன் பத்திரமாக மீட்ட காவல்துறை மற்றும் தீயணைப்புத்துறையினரை போலீஸார் பாராட்டினர். இச்சம்பவம் அப்பகுதியில் பெரும் பரபரப்பை நேற்று ஏற்படுத்தியது.