கூடங்குளம் அணுமின் நிலையத்தில் உள்ளூர் மக்களுக்கு வேலை வழங்க கோரி போராட்டம்

உள்ளூர் மக்களுக்கு வேலை வாய்ப்பு வழங்க கோரி கூடங்குளம் கேட்டு முன்பு ஆயிரக்கணக்கானோர் போராட்டத்தில் ஈடுபட்டனர்.

நெல்லை மாவட்டம் கூடங்குளத்தில் ரஷ்ய நாட்டு உதவியுடன் தலா ஆயிரம் மெகாவாட் மின் திறன் கொண்ட 2 அணு உலைகள் அமைக்கப்பட்டு மின் உற்பத்தி செய்யப்பட்டு வருகிறது. மேலும் 3-வது 4-வது அணு உலைகள் அமைக்கும் பணி நடைபெற்று வருகிறது. இப்பணிகளில் கூடங்குளம் அணுஉலைகளுக்கு நிலம் கொடுத்தவர்கள் மற்றும் உள்ளூர் மக்களுக்கு பணிகள் வழங்க வேண்டும், என நீண்ட நாட்களாகவே கூடன்குளம் மற்றும் அதன் சுற்றுவட்டார கிராம பகுதி மக்கள் கோரிக்கை வைத்து இருந்தனர். இந்நிலையில் கடந்த இரு தினங்களாக கூடங்குளம் அணு உலையில் முப்பத்தி நான்கு பொறியாளர்கள் மற்றும் பணியாளர்கள் தேர்வுக்கான எழுத்து தேர்வு நடைபெற்று வருகிறது.

இந்நிலையில் இன்று காலை உள்ளூர் மக்களுக்கு வேலை வாய்ப்பு வழங்க வேண்டும் என வலியுறுத்தி மாவட்ட கவுன்சிலர்கள், ஆவரைகுளம் பாஸ்கர் ஜான் ரூபா, கூடங்குளம் கிராம ஊராட்சி மன்ற தலைவி வின்சி ஆகியோர் தலைமையில் கூடன்குளம் வளாக கேட் முன்பு ஆயிரத்திற்கும் மேற்பட்டோர் திரண்டு தர்ணா போராட்டத்தில் ஈடுபட்டு வருகின்றனர். இதனால் அப்பகுதியில் பெரும் பரபரப்பு ஏற்பட்டுள்ளது. இதனால் கூடன்குளம் அணு உலையில் பணிக்கு வருபவர் வாகனங்கள் மற்றும் பணியாளர்கள் திருப்பி அனுப்பப்பட்டு வருகின்றனர்.