12 ஆம் வகுப்பு பொதுத்தேர்வு: நெல்லை ஆட்சியர் ஆய்வு
பர்கிட் மாநகரம் அரசு மேல்நிலைப்பள்ளியில் 12 ஆம் வகுப்பு பொதுத் தேர்வு நடைபெற்று வருவதை ஆட்சியர் விஷ்ணு நேரில் சென்று பார்வையிட்டு ஆய்வு செய்தார்.
HIGHLIGHTS
பாளையங்கோட்டை ஊராட்சி ஒன்றியம் பர்கிட் மாநகரம் அரசு மேல்நிலைப்பள்ளியில் ஆய்வு மேற்கொண்ட ஆட்சியர் விஷ்ணு.
திருநெல்வேலி மாவட்டம், பாளையங்கோட்டை ஊராட்சி ஒன்றியம் பர்கிட் மாநகரம் அரசு மேல்நிலைப்பள்ளியில், 12 ஆம் வகுப்பு படிக்கும் மாணவ,மாணவியர்களுக்கு பொதுத் தேர்வு இன்று (05.05.2022) நடைபெற்று வருவதை மாவட்ட ஆட்சித் தலைவர் வே.விஷ்ணு நேரில் சென்று பார்வையிட்டு ஆய்வு செய்தார்.
பின்னர் செய்தியாளர்களை சந்தித்த மாவட்ட ஆட்சியர் வே.விஷ்ணு, திருநெல்வேலி மாவட்டத்தில் 12 ஆம் வகுப்பு பொதுத் தேர்வு இன்று நடைபெற்று வருகிறது. இதில் 12ஆம் வகுப்பு பொதுத்தேர்வு எழுதுபவர்கள் 21345 மாணவ. மாணவியர்களும், மத்திய சிறை பொதுத்தேர்வு எழுதுபவர்கள் 7 நபர்களும், தனித்தேர்வு மையம் எழுதுபவர்கள் 354 நபர்களும் ஆக மொத்தம் 21706 மாணவ,மாணவியர்கள் பொதுத்தேர்வு இன்று எழுதுகின்றனர்.
11 ஆம் வகுப்பு படிக்கும் மாணவ,மாணவியர்களுக்கு பொதுத் தேர்வு நடைபெறவுள்ளது. இதில் 21757 மாணவ, மாணவியர்களும், மத்திய சிறை பொதுத்தேர்வு எழுதுபவர்கள் 7 நபர்களும், தனித்தேர்வு மையம் எழுதுபவர்கள் 272 நபர்களும் ஆக மொத்தம் 22036 மாணவ, மாணவியர்கள் பொதுத்தேர்வு எழுதவுள்ளார்கள்.
மாவட்டத்தில் இந்த பொதுத் தேர்வு எழுதுவதற்கு மொத்தம் 73 மையங்கள் அமைக்கப்பட்டுள்ளது. இம்மையங்களை கண்காணிக்க 73 முதன்மைக் கண்காணிப்பாளர்களும், 99 துறைக் கண்காணிப்பாளர்களும், 1068 அறைக்கண்காணிப்பாளர்களும், பறக்கும் படை பணியில் 186 நபர்களும் இப்பணியில் ஈடுப்படுத்தப்பட்டு கண்காணிக்கப்பட்டு வருகிறது.
தேர்வு எழுதும் மையங்களில் அடிப்படை வசதிகளான குடிநீர்வசதி, கழிப்பறை வசதி, ஏற்பாடு செய்யப்பட்டுள்ளது. தேர்வு எழுதும் மையங்களில் 24 மணி நேரமும் மின்சாரம் வசதி ஏற்பாடு செய்யப்பட்டுள்ளது. தேர்வு எழுதும் மாணவ, மாணவியர்கள் அனைவருக்கும் முகக்கவசம் வழங்கப்பட்டுள்ளது.
மாணவ.மாணவியர்கள் அனைவரும் முகக்கவசம் அணிய வேண்டும் சமூக இடைவெளி பின்பற்ற வேண்டும் என அறிவுறுத்தப்பட்டுள்ளது. தேர்வு எழுத வரும் அனைத்து மாணவ, மாணவியர்களையும் கொரோனா சோதனை செய்யப்பட்டு வருகிறது. அவர்களில் எவருக்கும் கொரோனா அறிகுறி தென்பட்டால் அவர்களுக்கு தனி அறை ஒதுக்கீடு செய்யப்பட்டுள்ளது. தேர்வு எழுதும் அனைத்து மையங்களிலும் கொரோனா தடுப்பு நடவடிக்கைகள் மேற்கொள்ளப்பட்டுள்ளது. என தெரிவித்தார்.
இவ்வாய்வின் போது மாவட்ட முதன்மை கல்வி அலுவலர் சுபாஷினி, முதன்மை கல்வி அலுவலர் நேர்முக உதவியாளர் டைடஸ் ஜான் போஸ்கோ, பறக்கும்படை கண்காணிப்பாளர் கணேசன், மற்றும் அரசு அலுவலர்கள் உடனிருந்தனர்.
