கிராமப்புற சேவைக்காக காஞ்சிபுரம் மருத்துவருக்கு மத்திய அமைச்சர் நாளை தங்கப்பதக்கம் வழங்குகிறார்..!

காஞ்சிபுரத்தில் உள்ள அண்ணா நினைவு புற்றுநோய் மருத்துவமனை மற்றும் ஆராய்ச்சி மையத்தில் உதவிப் பேராசிரியராக பணியாற்றி வருபவர் த.தே.பாலமுருகன் (வயது 37). இவருக்கு கிராமப்புற மக்களுக்கு சிறப்பாக சேவை செய்ததற்காக தேசிய மருத்துவக் கல்வி தேர்வு வாரியம் மத்திய அரசின் உயரிய விருதை புது டெல்லியில் நாளை வழங்குகிறது.

காஞ்சிபுரம் அண்ணா நினைவு புற்றுநோய் மருத்துவமனை மற்றும் ஆராய்ச்சி மையத்தில் உதவிப் பேராசிரியராகவும், புற்றுநோய் பிரிவில் உயர் அறுவை சிகிச்சை நிபுணராகவும் பணியாற்றி வருபவர் டாக்டர் பாலமுருகன்.

இவர் புற்றுநோயியல் துறையில் கிராமப்புற மக்களுக்கு சிறப்பான சேவை மற்றும் விழிப்புணர்வு செய்தமைக்காக மத்திய அரசின் உயரிய விருதுக்கு தேர்வாகியுள்ளார். இவருக்கு புது டெல்லியில் அம்பேத்கர் தேசியக் கல்வி மையத்தில் நடைபெறும் 21வது பட்டமளிப்பு விழாவில் மத்திய சுகாதாரம் மற்றும் குடும்ப நலத்துறை அமைச்சர் மன்சுக் மாண்டவியா நாளை (திங்கள்கிழமை) விருதை வழங்கி கௌரவிக்கவுள்ளார்.

செங்கல்பட்டு மாவட்டம், அச்சரப்பாக்கம் கிராமத்தை சேர்ந்த மருத்துவர் பாலமுருகன், சென்னை அரசு மருத்துவக்கல்லூரியில் மருத்துவப் படிப்பை முடித்தவர். காஞ்சிபுரம் பேருந்து நிலையம் அருகில் கங்கா புற்றுநோய் ஆலோசனை மையம் ஒன்றையும் அமைத்து, பொதுமக்களுக்கு புற்றுநோய் குறித்த விழிப்புணர்வும் ஏற்படுத்தி வருகிறார்.

தமிழகத்திலேயே, முதல்முறையாக அரசு மருத்துவக்கல்லூரியில் உயர் மருத்துவக்கல்வி படித்து அரசு மருத்துவமனையில் பணியாற்றி வரும் ஒருவருக்கு மத்தியஅரசு விருது அறிவித்து இருப்பது, குறிப்பிடத்தக்கது. இது தமிழகத்துக்கும், காஞ்சிபுரத்துக்கும் கிடைத்த பெருமை என அரசு புற்றுநோய் மருத்துவமனை மருத்துவர்கள், பணியாளர்கள் பலரும் மருத்துவர் பாலமுருகனுக்கு வாழ்த்துக்களை தெரிவித்தனர்.