பிரசாரத்திற்கு சொன்ன டைமுக்கு வராத பிரேமலதா! பொதுமக்கள் அவதி

பிரச்சாரத்திற்கு தலைவர்களே சொன்ன டைமுக்கு வாங்க.. கடும் வெயில் காஞ்சியில் நடைபெற்ற பிரச்சாரக் கூட்டத்தில் அவதிப்பட்ட முதியோர்கள் நிலை கடும் அதிர்ச்சியை ஏற்படுத்தியது.

தமிழக முழுவதும் கோடை வெப்பம் தற்போது இரண்டு முதல் ஐந்து டிகிரி செல்சியஸ் வரை அதிகரித்துள்ளதாகவும், முதியோர்கள், கால்நடைகள் என அனைத்து தரப்பினரும் இந்த வெப்ப அலையிலிருந்து காத்துக் கொள்ள வேண்டும் என அரசு கேட்டுக் கொண்டுள்ளது.

குறிப்பாக தற்போது நாடாளுமன்ற தேர்தல் நடைபெற்று வருவதால் பிரச்சாரங்களில் முதல் நிலை தலைவர்கள் தீவிரமாக உள்ளனர்.

கோடை வெப்பம் காலை 9 மணிக்கு தொடங்கி மாலை 5 மணி வரை வெப்ப அலை வீசுவதும் , அதன்பின் எந்தவித குளிர்ந்த காற்றும் இல்லாததால் பொதுமக்கள் பெரிதும் அவதிப்பட்டு வருகின்றனர்.

இந்நிலையில் இன்று காலை தேமுதிக பொதுச் செயலாளர் பிரேமலதா காஞ்சிபுரம் நாடாளுமன்ற தொகுதி அதிமுக வேட்பாளருக்கு ஆதரவாக வாக்குகள் சேகரிக்க காலை 10 மணிக்கு வருவதாக அறிவிக்கப்பட்டிருந்தது.

இதனால் விஜயகாந்த் இறப்பிற்கு பின் பிரேமலதாவை நேரில் பார்க்கும் வாய்ப்பு கிடைக்கும் என பல சுற்றுப்பட்டி கிராமங்களில் இருந்து ஏராளமான பெண்கள், 50 -65 வயது தாண்டிய மூத்த குடிமக்கள் அதிக அளவில் கூடியிருந்த நிலையில், வெப்பம் தாங்காமல் அருகில் இருந்த கடைகளின் வாயிலில் பல மணி நேரம் தஞ்சம் அடைந்தனர்.

மேலும் பெண்கள் தங்கள் புடவை முந்தானையினை கொண்டு தலையை வெப்பத்திலிருந்து பாதுகாக்கும் வண்ணம் ஈடுபட்டனர். அருகில் இருந்த குடை , சிறிய கடைகள், ஒலிபெருக்கியின் நிழல் என அனைத்திலும் தஞ்சமடைந்து காணப்பட்ட காட்சி பெரும் வருத்தத்தை ஏற்படுத்தியது.

கூட்டத்திற்காக அழைத்து வரப்பட்டிருந்தாலும் இது போன்ற மூத்த குடிமக்கள் தற்போதைய காலத்தில் இதனை தவிர்க்கலாம் என அருகில் இருந்தவர்கள் தெரிவித்தனர்.