கேபிள் டிவி ஆப்ரேட்டர் கடத்தி கொலை, மர்மநபர்கள் வெறிச் செயல்

செங்கல்பட்டு மாவட்டம் மணிமங்கலம் அடுத்த நீலமங்கலம் பகுதியை சேர்ந்தவர் நாராயணமூர்த்தி (36). இவர் கூடுவாஞ்சேரி பகுதியில் கேபிள் டிவி நிறுவனத்தில் ஆப்ரேட்டராக பணியாற்றி வந்தார்.

இவருக்கு அமுதா என்ற மனைவி, ஹர்ஷினி(7) தர்ஷினி(4) என்ற இரண்டு மகள்களும் உள்ளனர். இந்நிலையில் நாராயணமூர்த்தி நேற்று வேலைக்கு சென்றவர் இரவு வரை வீடு திருப்பவில்லை.

அனைவி அமுதா பல இடங்களில் தேடியும் எந்த தகவலும் இல்லை. செல்போன் ஸ்விட்ச் ஆப் செய்யப்பட்டிருந்தது. இதற்கிடையில் இன்று அதிகாலையில் கூடுவாஞ்சேரி பொத்தேரி ரயில் நிலையங்களுக்கிடையே ரயில்வே தண்டவாளத்தில் நாராணமூர்த்தியின் உடல் வெட்டுக்காயங்களுடன் கிடந்தது.

உடனடியாக அதைப்பார்த்த பொதுமக்கள் கூடுவாஞ்சேரி போலீசுக்கு தகவல் கொடுத்தனர். அவர்கள் வந்து பார்த்துவிட்டு, உடல் ரயில்வே தண்டவாளத்தில் கிடக்கிறது. எனவே தாம்பரம் ரயில்வே போலீஸ் தான் வந்து உடலை எடுத்து விசாரணை நடத்த வேண்டும் என்று கூறினர்.

தாம்பரம் ரயில்வே போலீசார் வந்து பார்த்தனர். ரயிலில் அடிப்பட்டு இறந்தால் மட்டுமே நாங்கள் உடலை எடுத்து விசாரணை நடத்துவோம்.ஆனால் இது வெளியில் கொலை செய்து உடலை தண்டவாளத்தில் வீசி சென்றுள்ளனர்.

எனவே கூடுவாஞ்சேரி போலீஸ் தான் விசாரணை நடத்த வேண்டும் என்று கூறிவிட்டனர். இதனால் சில மணி நேரம் உடல் அகற்றப்படாமல் தண்டவாளங்கள் அருகிலேயே கிடந்தது.

அதன்பின்பு காலை 8.30 மணிக்கு மேல் தாம்பரம் ரயில்வே போலீசார் வந்து உடலை எடுத்து குரோம்பேட்டை அரசு மருத்துவமனை சவக்கிடங்கிற்கு அனுப்பி வைத்தனர். அதோடு நாரயணமூர்த்தியை கொலை செய்து ரயில் தண்டவாளத்தில் வீசிய கொலையாளிகளை தேடிவருகின்றனர்.