கொள்ளிடம்ஆற்றில் தடுப்பணை குறைதீர்க்கும் நாள் கூட்டத்தில் வலியுறுத்தல்

அரியலூர் மாவட்ட ஆட்சியர் கூட்டரங்கில் விவசாயிகள் குறைதீர்க்கும் நாள் கூட்டம் மாவட்ட ஆட்சியர் ரமண சரஸ்வதி தலைமையில் நடைபெற்றது. இந்த கூட்டத்தில் விவசாய சங்கப் பிரதிநிதிகள் மற்றும் விவசாயிகள் பலர் கலந்து கொண்டனர். கூட்டத்தில் பேசிய விவசாய சங்க பிரதிநிதிகள், அரியலூர் மாவட்டம் தூத்தூர் பகுதியில் கொள்ளிடம் ஆற்றில் தடுப்பணை கட்ட கடந்த 2020ஆம் ஆண்டு ஆய்வுப்பணிகள் நடைபெற்று திட்ட அறிக்கை தயார் செய்யப்பட்டுள்ள நிலையில் இத்திட்டம் மக்களுக்கும் விவசாயத்திற்கும் நன்மை பயக்கக்கூடிய திட்டம் இல்லை எனக்கூறி தற்போதைய அரசு தள்ளுபடி செய்துள்ளது.

இது விவசாயிகள் மத்தியில் அதிர்ச்சியை ஏற்படுத்தியுள்ளது. கொள்ளிடம் ஆற்றில் கடந்த 30 ஆண்டுகளுக்கும் மேலாக தடுப்பணை கட்ட வேண்டும் என வலியுறுத்தி வரும் நிலையில் கதவணை யுடன் கூடிய தடுப்பணை கட்டுவதற்கான திட்டத்தையும் தமிழக அரசு ரத்து செய்துள்ளது விவசாயிகளை பாதிக்கக்கூடிய வகையில் உள்ளது. எனவே கொள்ளிடம் ஆற்றில் தடுப்பணை கட்ட தமிழக முதல்வர் நடவடிக்கை எடுக்க வேண்டும்.

மேலும் நெல் கொள்முதல் நிலையங்களில் எக்காரணத்தைக் கொண்டும் விவசாயிகள் யாரும் லஞ்சம் கொடுக்க வேண்டியதில்லை என அரசு அறிவுறுத்தியும் தற்போது வரை 30 ரூபாயிலிருந்து 40 ரூபாய் வரை லஞ்சம் வாங்குகின்றனர். இதுகுறித்து உரிய நடவடிக்கை எடுக்க வேண்டும் என விவசாயிகள் வலியுறுத்தினர்.

அதற்கு பதிலளித்துப் பேசிய மாவட்ட ஆட்சியர் ரமண சரஸ்வதி நெல் கொள்முதல் நிலையங்களில் விவசாயிகள் யாரும் லஞ்சம் கொடுக்க வேண்டிய அவசியம் இல்லை. லஞ்சம் கேட்பதாக நெல் கொள்முதல் நிலைய அலுவலர்கள் மற்றும் பணியாளர்கள் மீது புகார் வந்தால் அவர்கள் மீது துறை ரீதியான நடவடிக்கை மற்றும் இடமாறுதல் உள்ளிட்ட நடவடிக்கைகள் எடுக்கப்படும் என தெரிவித்தார். கூட்டத்தில் அனைத்து துறை உயரதிகாரிகள் கலந்து கொண்டனர்.