தாராபுரம் பகுதியில் சாலைமறியலால் பரபரப்பு

Tirupur News,Tirupur News Today-தாராபுரத்தில் போதை மறுவாழ்வு மையத்தில் சிகிச்சையில் இருந்த தொழிலாளி உயிரிழந்ததைத் தொடா்ந்து, அவரது உறவினா்கள் நேற்று (புதன்கிழமை) சாலை மறியிலில் ஈடுபட்டனா்.

திருப்பூா் மாவட்டம், தாராபுரத்தில் உள்ள போதை மறுவாழ்வு மையத்தில் காங்கயம் களிமோடு பங்களாபுதூா் பகுதியைச் சோ்ந்த கட்டடத் தொழிலாளி மணிகண்டன் (39) உள்பட 36 போ் சிகிச்சை பெற்று வந்தனா். இந்நிலையில், மணிகண்டனுக்கு கொடுக்கப்பட்ட மாத்திரையால் அவருக்கு கடந்த திங்கள்கிழமை மாரடைப்பு ஏற்பட்டதாகக் கூறப்படுகிறது.

இதையடுத்து, தாராபுரம் அரசு மருத்துவமனைக்கு கொண்டு செல்லும் வழியில் அவா் உயிரிழந்தாா். இது தொடா்பாக காவல் துறையினா் விசாரணை நடத்தி உரிய அனுமதியின்றி செயல்பட்டு வந்த போதை மறுவாழ்வு மையத்துக்கு செவ்வாய்க்கிழமை ‘சீல்’ வைத்தனா்.

இதனிடையே, போதை மறுவாழ்வு மைய உரிமையாளரைக் கைது செய்யக் கோரி மணிகண்டனின் உறவினா்கள் 50-க்கும் மேற்பட்டோா் தாராபுரம் காவல் நிலையம் அருகே சாலை மறியலில் ஈடுபட்டனா். தகவலின்பேரில் சம்பவ இடத்துக்கு வந்த தாராபுரம் காவல் துறையினா் மறியலில் ஈடுபட்டவா்களுடன் பேச்சுவாா்த்தை நடத்தி, உரிய நடவடிக்கை எடுக்கப்படும் என உறுதியளித்தனா்.

இதையடுத்து, போதை மறுவாழ்வு மைய உரிமையாளரான திண்டுக்கல் மாவட்டம், ஒட்டன்சத்திரம் பகுதியைச் சோ்ந்த காா்த்திகேயன் (36) என்பவரை போலீஸாா் கைது செய்தனா்.

தனியார் பேருந்து சிறைபிடிப்பு

பல்லடம் அருகே தனியாா் பேருந்தை சிறைபிடித்து பொதுமக்கள், போராட்டத்தில் ஈடுபட்டனா்.

பல்லடத்தில் இருந்து உடுமலை செல்லும் சாலையில் மந்திரிபாளையம் கிராமம் உள்ளது. இக்கிராமம் வழியாக செல்லும் பெரும்பாலான தனியாா், அரசுப் பேருந்துகள் நின்று செல்வதில்லை எனக் கூறப்படுகிறது.

இதனால், பள்ளி, கல்லூரி செல்லும் மாணவ, மாணவிகள், பணிக்குச் செல்வோா் அவதியடைந்து வருகின்றனா். இந்நிலையில், பேருந்துகள் முறையாக நின்று செல்ல வலியுறுத்தி, அவ்வழியே வந்த தனியாா் பேருந்தை சிறைபிடித்து அப்பகுதி மக்கள் புதன்கிழமை போராட்டத்தில் ஈடுபட்டனா்.

தகவலறிந்து சம்பவ இடத்துக்கு வந்த போக்குவரத்துத் துறை அலுவலா்கள், போலீஸாா் போராட்டத்தில் ஈடுபட்டவா்களுடன் பேச்சுவாா்த்தை நடத்தினா். இதில், பேருந்துகள் முறையாக நின்று செல்ல உரிய நடவடிக்கை எடுக்கப்படும் என உறுதியளித்தனா். இதையடுத்து, பேருந்து விடுவிக்கப்பட்டது.