திருவாரூரில் ஆன்லைன் மூலம் லாட்டரி விற்பனை செய்த 8 பேர் கைது

தமிழக அரசால் தடை செய்யபட்ட வெளி மாநில ஆன்லைன் லாட்டரிகளை போலியாக தயாரித்து கணினி மூலம் பதிவிறக்கம் செய்து, தனியாக சாப்ட்வேர் தயார் செய்து வாட்ஸ்-அப் குழு அமைத்து பொதுமக்களை ஏமாற்றி மோசடியாக பணம் பறிக்கும் எண்ணத்தில் திருச்சி, தஞ்சாவூர், திருவாரூர் ஆகிய பல மாவட்டங்களில் விற்பனை செய்து வருவதாக தனிப்படை போலீசாருக்கு ரகசிய தகவல் கிடைத்தது.

இந்த தகவலின் அடிப்படையில் தனிப்படை போலீசார் தீவிர விசாரணை நடத்தி தேடுதல் வேட்டையில் ஈடுபட்டனர். இதில் திருவாரூர் பெரிய மில் தெருவை சேர்ந்த சரவணன் (வயது 48), கொரடாச்சேரி வடக்குமாங்குடியை சேர்ந்த குமரேசன் (52), கூத்தாநல்லூர் வாழச்சேரியை சேர்ந்த விஜய்குமார் (35), மன்னார்குடி பைங்காநாடு பகுதியை சேர்ந்த ராஜேஷ் கண்ணா (32), கூத்தாநல்லூர் பொதக்குடியை சேர்ந்த மணிகண்டன் (30) மற்றும் திருச்சி ஸ்ரீரங்கத்தை சேர்ந்த மீரான் (37), திருச்சி தொட்டியம் காட்டுபுத்தூரை சேர்ந்த சண்முகவேல் (27) மற்றும் ஒரு பெண் உள்பட 8 பேரை கைது செய்தனர்.

அவர்களிடம் இருந்து லாட்டரி சீட்டு கட்டுகள், ரூ.12 லட்சம் ரொக்க பணம்4 மடிக்கணினி, 14 செல்போன் ஆகியவற்றை பறிமுதல் செய்தனர். இதுகுறித்து திருவாரூர் நகர காவல் நிலைய ஆய்வாளர் ரமேஷ் தொடர் விசாரணை நடத்தி வருகிறார்.